Berdevkê Wezareta Karên Derve ya Îranê, Îsmaîl Beqaî dibêje ku danûstandinên bi Umanê re di qonaxa dawiyê de ne. Lê li gorî Îranê, asayîbûna tevahî ya Hurmuzê hîn jî bi rakirina dorpêça deryayî ya Amerîkayê ve girêdayî ye.
Hikûmeta Îranê ragihand ku danûstandinên bi Sultanê Umanê re ji bo rêkûpêkkirina derbasbûna keştiyan di Tengava Hurmuzê de gelek pêş ketine û her du alî nêzî gihîştina peymanekê ne. Tehranê diyar kir ku di vê mijarê de bi Washingtonê re tu danûstandin nayên meşandin û hemû hewildan bi Umanê re tên kirin.
Tengava Hurmuzê yek ji girîngtirîn rêyên veguheztina petrol û gazê li cîhanê ye. Ji ber vê yekê, her guhertinek li ser rêjeya derbasbûna keştiyan dikare bandoreke mezin li bazarên enerjiyê bike.
Lêbelê, çavkaniyên fermî yên Îranê dibêjin ku vegera şert û mercên berê hîn jî bi biryara Amerîkayê ve girêdayî ye. Li gorî wan, heta ku Washington dorpêça deryayî ya li ser benderên Îranê raneke, şertên ji bo derbasbûna Hurmuzê çênabin.
Daxuyaniya hevpar amade dibe
Berdevkê Wezareta Karên Derve ya Îranê, Îsmaîl Beqaî, di axaftinekê de ji ajansa fermî IRNAyê re got ku her du welat li ser rêya derbasbûnê û koordînatên wê li hev hatine û wiha got: “Ger aliyên sêyemîn pêvajoyê asteng nekin, daxuyaniya hevpar a her du welatan niha di qonaxa dawiyê ya amadekirinê de ye.”
Her wiha got ku şertên ewlehiyê li Hurmuzê hîn jî bi tevahî baş nebûne. Li gorî wî dorpêça deryayî ya Amerîkayê li ser benderên Îranê û çalakiyên din ên leşkerî hîn jî sedemên sereke yên alozbûna herêmê ne.
