Dadgeha Cezayê Giran a Cizîrê carek din Burak Ercan ê ku destdirêjiyê li ser 38 zarokan kiribû, beraet kir.
Danişîna duyemîn a destdirêjiya li ser 38 zarokan ku ji aliyê Alîkarê Gerînendeyê Dibistana Navîn a Anadolûyê ya Cizîrê Burak Ercan ku cezayê lê hatibû birîn û hatibû xerakirin li 2yemîn Dadgeha Cezayên Giran a Cizîrê pêk hat. Gelek rêveberên partiyên siyasî, saziyên sivîl û parêzer tev li danişînê bûn. Bersûc Burak Ercan bi rêya Pergala Deng û Dîmen (SEGBÎS) tev li danişînê bû.
Piştî danişînê dest pê kir ewilî dozger axivî û got: “Ji ber ku delîl nehatine komkirin û sûc bi awayek rast e rast pêk nehatiye em beraetê dixwazin.”
Piştre bersûc Burak Ercan axivî û diyar kir ku di ser buyerê re gelek dem derbas bûye û delîl nehatine komkirin û îdia kir ku sûcê li ser wî ner rast e û xwest were beraetkirin.
Parêzerê dozê Rojhat Dîlsîz axivî û got: “Em ji ber mutalaya dozger a beraetê dixwazin danişîn were taloqkirin.”
Li ser daxwaza parêzer Rojhat Dîlsîz heyeta dadgehê daxwaza taloqirina dozê red kir.
‘Em dev ji vê dozê bernadin’
Parêzer Rojhat Dîlsiz axaftina xwe wiha domand: “Em vê dozê dişopînin û vê dozê dizanin. Niha li ber deriyê adliyeyê ew qas ewlehî hatiye stendin. Ez ji 2019an ve vê dozê dişopînim. Li ser evqas gilî û dozan Burak Ercan tenê rojekê nehatiye binçavkirin. Îdeanameya hatiye amadekirin ji bo parastina Bûrak Ercan hatiye amadekirin. Di vî welatî de polîtîkayek bêcezatiyê heye. Bila Burak Ercan bizane em dev ji vê dozê bernadin û em ê heya dadgehên herî bilind vê dozê bibin. Em baş dizanin weke gelek dozên din, ev doz jî dê li Dadgeha Qanûna Bingehîn were betalkirin.”
Parêzer Sînan Guzel jî got: “Ji destpêka dozê heya niha ji bo delîl werin komkirin gav nehatine avêtin. Daxwaza me ew ku biryar li vê dozê neyê danîn û ji bo hemû aliyên dozê werin zelalkirin doz were taloqkirin.”
Tevî parastin û nerazîbûna parêzeran jî heyeta dadgehê navber da danişînê û piştî navberê derbarê Burak Ercan de biryaraya beraetê da.
Piştî biryara dadgehê kesên tevli danişînê bûne bertek nîşanî biryarê dan û gotin carek din edalet hatiye tunekirin.
Çi bûbû?
Li navçeya Cizîrê ya Şirnexê Alîkarê Gerînendeyê Dibistana Navîn a Anadolûyê Bûrak Ercan destdirêjî li ser 38 zarokan pêk anîbû û piştî bûyer derket holê Burak Ercan demeke dirêj nehat darizandin. Piştî darizandina li 2yemîn Dadgeha Cezayên Giran a Cizîrê 3 sal û 9 meh ceza li Burak Ercan hat birîn. Li ser îtîraza parêzerê Burak Ercan Dadgeha Herêmî ya Amedê cezayê hatiye birîn xera kir û carek din doz li Cizîrê pêk hat. Piştî xerabkirina cezayê Burak Ercan, Şaxa Egîtîm Senê ya Şirnexê ji bo Burak Ercan were cezakirin 5 hefteyan çalakiya nobetê edaletê li dar xist.
