Ji Qada Şêx Seîd derketin rê û berê xwe dan Amarayê. Gorên pêşengan ziyaret kirin û soz dan ku têkoşîna wan gerdûnî bikin. Soz dan ciwanên pêşeng ku rêwîtiya wan her dem geş û zindî bikin. Slav ji xwediyê silavan re şandin.
Meşvanên Amarayê li cihê cihê ku Şêx Seîd lê hat darvekirin kom bûn û ala pêşengê serhildanê dewir girtin. Ji qada Şêx Seîd derketin rê û berê xwe dan şopa ciwanên şoreşger û têkoşer. Ewil li Sêwêregê silav dan Mahmûd Zengîn, piştre derbasî Curnê Reş bûn û ala pêşengên ciwanan Cuma Tak, Salîh Kandal, Emîn Yavûz, Halîl Çavgun, Sûltan Yavuz, Hanim Kaya girtin û derbasî Pirsûsê bûn. Ji wir soz dan 33 ciwanên sosyalîst û berê xwe dan Amarayê.
Endamên Meclisa Ciwanên DEM Partiyê hefteyek berê plan kirin ku dê ji 1ê Nîsanê heta 4ê Nîsanê ji Amedê heta Amarayê bimeşin. Ciwan bi boneya 76emîn salvegera 4ê Nîsanê roja Rojbûna Rêberê Gelê Kurd Abdullah Ocalan pîroz bikin di 1ê Nîsanê de kom bûn. Ciwan ji çar aliyê Tirkiye û Bakurê Kurdistanê hatin li Qada Şêx Seîd kom bûn û li vir daxuyanî dan. Ev der ji bo Kurdan cihekî dîrokî û bi wate ye. 100 sal berê Şêx Seîd û 46 helavên xwe di 29ê hezîrana 1925an de li Deriyê Çiyê hatin darvekirin. Şêx Seîd û hevalên xwe ji bo mafê gelê kurd serî hildabûn, lê rayedarên dewletê ew darve kirin. Xwestibûn doza kurdan li vir darve bikin û rawestînin. 100 sal borîn, lê îro dîsa ciwanên Kurd li vê qadê kom bûn, ala pêşengên xwe dewir girtin û berê xwe dan Amarayê. Ciwanan doza 100 sal berê ya Şêx Seîd, di 4ê Nîsanê roja Rojbûna Rêberê Gelê Kurd Abdullah Ocalan de gihandin Amarayê. Bi doz û têkoşîna Rêberê PKKê Abdullah Ocalan re kirin yek.
Ciwanên ku li qada Qada Şêx daxuyanî dan, berê xwe dan Sîweregê. Ewil gora Mahmûd Zengîn ziyaret kirin û soza têkoşînê dan wî. Piştre berê xwe dan Hîlvanê û gorên Cuma Tak, Salîh Kandal, Emîn Yavûz, Halîl Çavgun, Sûltan Yavuz, Hanim Kaya, Fîdan Kaya û Berfîn Yetkîn ziyaret kirin û ala wan hilgirtin. Li navçeya Pirsûsê jî 33 ciwanên enternasyonalîst ên di êrîşa DAIŞê de jiyana xwe ji dest dan ziyaret kirin û soza gerdûnîbûnê dan wan. Ciwanan piştre berê xwe dan gora Mustafa Dag û li vir Mustafa Dag û Mahsûm Karaoglan bibîr anîn. Li vir jî soz dan wan ku dê meşa Rêwîtiya Rojê ya ber bi Amarayê ve berdewam bikin û her dem mayînde bikin. Piştre li Xalfetiyê bûn mêvan û roja 4ê Nîsanê berê xwe dan Amarayê.
Ciwan dema di 1ê Nîsanê de ji Amedê derketin rê zêdeyî 100 kesan bûn. Piştî gihiştin Sêwêregê bi girseyî hatin pêşwazîkirin û hejmar li xwe zêde kirin. Piştî şevekê li Sêwêregê bûn mêvan, roja 2ê Nîsanê gorên ciwanên pêşengên ziyaret kirin û bi komeke mezintir berê xwe dan navçeya Curnê Reş (Hîlvan). Li vir bêtir bi girseyî hatin pêşwazîekirin. Li vir jî ewil çûn ser gorên ciwanên pêşengên Tevgera Azadiyê. Li vir jî peyama “Me bi ciwantî dest pê kir em ê bi ciwantî berdewam bikin” dan. Meşvanên ciwan ên Amarayê gotin: “45 sal berê we bi komekê rê li pêşiya me vekir. Lê îro em bûn bi hezaran û em di vê rêya we de dimeşin” û soza berdewama têkoşînê dan Cuma Tak, Salîh Kandal, Emîn Yavûz, Halîl Çavgun, Sûltan Yavuz, Hanim Kaya. Ciwanan piştî vê sozê berê xwe dan navçeya Pirsûsê ya Rihayê. Vê carê bi hêjmareke hîn mezinter derketin rêya Pirsûsê. Ciwan dema gihiştin navçeya Pirsûsê bêtir bi girseyî û bi coş hatin pêşwazîkirin. Ewil çûn Navenda Çanda Amara ku 33 ciwanên sosyalîst ku di êrîşa DAIŞê de hatibûn kuştin ziyaret kirin. Li vir anîn ziman ku ewê xwe û ciwanên Tirkiyeyê bi rêxistin bikin û ala hemû ciwanên sosyalîst hilgirin ser milê xwe û berê xwe bidin gundê Rojê. Ciwan di roja 3ê Nîsanê de ji Pirsûsê berê xwe dan Xalfetiyê û tevî hemû astengiyan xwe gihandin Xalfetiyê. Tevî êrîşa leşkeran jî bend û astengiyên leşkeran derbas kirin û ketin rê. Li vir peyama “Hûn çiqas bend û barîkatan dînin jî, hûn çiqas êrîş bikin jî hûn nikarin rêwîtiya me ya azadiyê rawestînin. Hûn nikarin bendan di navbera me û Roja mede ava bikin” dan rayedarên dewletê. Ciwan piştî gihiştin Xalfetiyê bi meşaleyan û govendê hatin pêşwazîkirin. Bi nameya Rêberê Gelê Kurd Abdullah Ocalan hatin pêşwazîkirin. Bi silavên Rêberê Gelê Kurd Abdullah Ocalan hatin pêşwazîkirin.
Rêber Abdullah Ocalan ciwan silav kirin
Ciwanan li vir nameya Rêberê Gelê Kurd Abdullah Ocalan xwendin û slavên xwe şandin ji xwediyê silavê re. Rêberê Gelê Kurd Abdullah Ocalan di nameya xwe de peyama; “Meha Nîsanê ji bo min Ronesansek e. Zayînek ji nû ve ye. Meşa ciwanan, meşa ber bi azadiyê ve ye. Meşandina ber bi azadiyê ve, bi wate ye. Ez diçûm ku min xwe bi rêxistin dikir. Gava ez diçûm dibistanê komek min a ku bi min re tevdigeriya hebû. Civakbûyîn bi vî awayî çêdibe. Ji zaroktiya xwe heya niha ez vî tiştî dikim. Sosyalîzm, civak e. Civaktî ye. Sosyalîstî jî civakbûyîn e. Li Kurdîstanê jî pêwîste bi vê têgihiştinê siyaset bê kirin. Navê wê siyaseta civakî û sosyalîst e. Ev jî bi rêxistinkirinê dibe. Rêxistinî, karê herî girîng e. Heger hûn nekin, ez ê bi tunî rexne bikim. Ji bo wê (jî) li her derê pêwiste hûn xwe rêxistin bikin. Her derê (jî) rêxistin bikin. Piştgiriya xebatên we dikim, silavên xwe ji we re dişînim.” ji ciwanan re şand û xwest ciwan bêtir xwe û dora xwe bi rêxistin bikin.
Ciwanan li navçeya Xelfetî ya Rihayê bi dirûşma “Bijî Serok Apo”,”Rojbûna te pîroz be ey Serok” peyama Rêber Abdullah Ocalan pêşwazî kirin û girêdana xwe ya Abdullah Ocalan anîn ziman. Ciwanên ku ji Amedê heta Xalfetiyê hatin her ku gund û navçe derbas kirin hêjmara wan zêde bû. Her ku gund û navçe derbas kirin coş û kelecana wan zêde bû. Piştî gihiştin Xalfetiyê gihiştin hezaran û bi hezaran li Parka 4ê Nîsanê beşdarî mihrîcanê bûn. Ciwanên ku tevî girseyê heta nîvê şevê govend gerandin, di roja 4ê Nîsanê berê xwe dan Amarayê. Ciwan li gel hezaran welatiyan ketin rêya Amarayê û li Amarayê 4ê Nîsanê Roja Rojbûna Rêberê Gelê Kurd Abdullah Ocalan bi coşa herî zêde pîroz kirin. Li vir jî posterê herî mezin ê Rêber Abdullah Ocalan vekirin û destnişan kirin ku rojbûna Abdullah Ocalan rojbûna ciwanan û gelê Kurd e. Destnîşan kirin ku rêwîtiya ku 76 sal berê li Amareyê dest pê kir, di pêşengiya cwianan de berdewam dike û ciwan dê bi rêxistinkirinê vê rêwîtiyê gerdûnî bikin.
