Li Hewlêrê civîna Şandeya Îmraliyê ya li gel Serokê Herêma Kurdistanê Nêçîrvan Barzanî, dest pê kir.
Şandeya DEM Partiyê ya Îmraliyê piştî ku di 28ê Kanûna 2024 û 22ê Çileya 2025an de bi Rêberê PKKê Abdullah Ocalan re hevdîtin pêk anî serdanên xwe didomîne.
Di heman çarçoveyê de Şandeya Îmraliyê di van kêliyan de bi Serokê Herêma Kurdistanê Nêçîrvan Barzanî re civiya. Nêçîrvan Barzanî, li ber ofîsa xwe pêşwazî li Şandeyê kir û piştre derbasî hundir bûn. Civîn li ofîsa Nêçîrvan Barzanî ya li Hewlêrê pêk tê. Civînê dest pê kir. Tê payîn di civînê de têkildarî pêvajoya li Bakurê Kurdistanê û Tirkiye tê axaftin bên kirin. Her wiha Şandeya Îmraliyê wê peyam û pêşniyariyên Abdullah Ocalan ji Nêçîrvan Barzanî re ragihîne.
Şande duh li gel Mesûd Barzanî civiyabû
Di çarçoveya serdanan de, Şandeya Îmraliyê ji bo hevdîtinan pêk bîne di 15ê Sibatê de hat herêma Herêma Kurdistanê û dest bi serdanan kir. Şandeya Îmraliyê duh di saet 10:00an de li navçeya Pîrmamê ya Hewlêrê bi serokê PDKê Mesûd Barzanî re civiya, civîna bi Barzanî re saetek û 45 deqîqe dewam kiribû.
Di şandeya Îmraliyê de kî cih digire
Di şandeyê de endamên Şandeya Îmraliyê Pervîn Bûldan û Sirri Sureyya Onder, Hevserokê Giştî yê Partiya Herêmên Demokratîk (DBP) Keskîn Bayindir, endamên Bûroya Hiqûqê ya Sedsalê Ozgur Erol û Îbrahîm Bîlmez, Hevberdevkê Komîsyona Têkiliyên Derve ya DEM Partiyê Berdan Ozturk, parlamenterên DEM Partiyê Gulcan Kaçmaz Sayyîgît û Mehmet Kamaç cih digirin.
Şande wê biçe Silêmaniyê jî
Tê payîn şandeya Îmraliyê li gorî bernameya xwe li Silêmaniyê jî bi serokê YNKê Bafil Celal Talebanî û cîgirê serokê hikumeta Herêma Kurdistanê Qubat Talebanî re jî bicive.
