Cenazeyê Hevserokê DEM Partiya Êlihê Mustafa Mesût Tekîk bi beşdariya hezaran kes li kêleka gora xwişka wî ya rojnameger Gulistan Tara hat veşartin.
Hevserokê DEM Partiyê yê Êlihê Mustafa Mesût Tekîk duh li Stenbolê krîza dil derbas kiribû û jiyana xwe ji dest dabû. Cenazeyê Tekîk îro anîn Êlihê. Cenaze li Balafirgeha Êlihê bi girseyî hat pêşwazîkirin û bi karwanê wesayîtan birin Mizgefta Tilmercê û nimêja cenaze li vir hat kirin.
Piştî nimêja cenaze girseyê li pişt wesayîta cenaze heta Goristana Tilmercê meşiya û li vir merasîma cenaze li dar xist. Hevseroka Giştî ya DEM Partiyê Tulay Hatimogûllari, Hevserokên Giştî yên DBPê Keskîn Bayindir û Çîgdem Kiliçgun Uçar, parlamenterên DEM Partiyê, hevşaredarên DEM Partiyê, rêveberên rêxistinên sivîl, rêxistinên DEM Partî û DBPê yên li bakurê Kurdistanê, Dayikên Aştiyê, Aktîvîstên TJAyê û bi hezaran kes tev li merasîmê bûn.
Li kêleka Gulistan hat veşartin
Piştî wecîbeyên olî cenaze hat veşartin. Cenazeyê Mustafa Tekîk, li kêleka gora xwişka wî ya rojnameger Gulistan Tara ku di Tebaxa 2024an de li Silêmaniyê di encama êrişa SÎHAyê de hatibû qetilkirin, hat veşartin. Her kes xemgîn û ji çavê wan hêsir dibariyan.
Piştî cenaze hat veşartin, axaftin hatin kirin. Hevseroka DEM Partiya Êlihê Songul Korkmaz ewilî axivî û behsa têkoşîna hevserokê xwe Mustafa Tekîk kir û spasiya hemû kesên beşdarî merasîmê bûn e kir.
Hevserokê DBPa Êlihê Resûl Çetîn jî nameya ku hevrêyên Gulistan Tara yên têkoşînê nameya ku şandibûn, xwend.
Paşê jî Hevserokê DBPê Keskîn Bayindir axivî û sersaxî ji malbatê û hemû gelê Kurd re xwest û destnîşan kir ku ew ê xeyalên ji bo aştî û azadiyê yê Mustafa Tekîk pêk bînin.
Tulay Hatimogûllari jî axivî û diyar kir ku ew ê xeyalên ji bo aştî û azadiyê yê Mustafa Tekîk û Sirri Sureyya Onder pêk bînin.
Herî dawî jî birayê Tekîk, Ahmet Bulent Tekîk axivî û bi xêr hatina hemû kesî kir û got ku kekê wî Mustafa îşev mêvanê xwişka wî Gulistan û bavê wî ye.
Siyasetmedaran di dawiyê de qerenfîl danîn ser gora Tekîk û gora Gulistan Tara û fatîha hat xwendin.
Piştre girse derbasî Mala Şînê ya BATSOyê bû û sersaxî ji malbatê û DEM Partiyê re xwestin.
