Çapemeniya cîhanê peyama Rêberê Gelû Kurd Abdullah Ocalan a bi boneya 27ê Şubatê bi awayekî berfireh şopand û bi nûçe, analîz û şîroveyên nêzîk hev dan. Piraniya weşanan li ser pêdiviya reformên qanûnî, pêvajoya aştiyê û rola parlamentoya Tirkiyeyê rawestiyan. Di nûçe û analîzan de hate ragihandin ku banga Abdullah Ocalan dê di demên pêş de rêya pêvajoya siyasî diyar bike.
Peyama 27ê Şubatê ya Abdullah Ocalan di çapemeniya cîhanê de bi sernav û şîroveya cuda hate ragihandin. Gelek ajans û rojnameyên cîhanê bang wekî pêşveçûneke girîng a di çarçoveya nîqaşên aştiyê û reformên qanûnî yên li Tirkiyeyê de nirxandin.
Reuters: Pêdiviya rêzik qanûnan tê xwestin
Ajansa Reutersê nûçeyek bi sernavê, “Serokê PKKê yê di zindanê de dibêje ji bo pêvajoya aştiyê li Tirkiyeyê pêdiviya derxistina rêzikên qanûnan heye” ji aboneyên xwe re serwês kir. Di naveroka nûçeyê de hat diyarkirin ku Ocalan ji bo derbasbûna ber bi entegrasyona demokratîk ve girîngiya reformên qanûnî destnîşan kiriye.
El Araby îşaret bi bandora Abdullah Ocalan kir
El Arabiya nûçeyek di heman çarçoveyê de weşan û peyamên Hevserokên DEM Partiyê Tulay Hatimogullari û Tuncer Bakirhan jî parve kirin. Di nûçeyê de hate gotin ku her du siyasetmedaran bang kirin ku ji bo reformên qanûnî gavên pratîk werin avêtin. Di nûçeyê de hate destnîşankirin ku ligel Abdullah Ocalan di zindanê de ye jî hê jî bandorek girîng li ser PKKê heye.
The Hindu: Banga reforman
Rojnameya Hindistanê The Hindu nûçeyek bi sernavê ku reformên qanûnî ji bo pêvajoya aştiyê pêwîstin in weşand. Di şîroveya rojnameyê de hate diyarkirin ku bang, dikare wek piştgirîya nexşeya rê ya ku ji aliyê komîsyona parlamentoya Tirkiyeyê ve hatiye pejirandin, were dîtin.
Asharq Al Awsat: Bang rê li ber pêvajoyê vedike
Rojnameya Asharq Al Awsat bang wekî pêşniyara ku rê li ber reformên qanûnî vedike nirxand û got ku peyam dikare wek alîkariyek ji bo pêşxistina pêvajoya siyasî were şîrovekirin.
The Washington Post: Bang li parlamentoya Tirkiyeyê kir
The Washington Post nûçe bi sernavê, “Abdullah Ocalan bang li parlamentoya Tirkiyeyê kir ku rêzik qanûnên nû werin derxistin” weşand û bal kişand ser rola parlamentoyê di pêşxistina pêvajoya siyasî de.
Associated Press: Banga aştiyê
Associated Press (AP) di nûçeya xwe de got ku bang salek piştî gazîkirina berê ya ji bo berdana çekan hatiye kirin. Ajansê destnîşan kir ku peyam di demeka Komîsyona Meclisê rapor weşandî û banga vegera endamên PKKê kirî de hat.
AFP: Destpêka qonaxeke siyasî ya nû
Ajansa AFPê jî nûçeyek bi sernavê, “ji Serokê PKKê yê di zindanê de, banga destpêka qonaxa siyasî ya nû” weşand û bang wek nîşana guherîna atmosfera siyasî nirxand.
BBC: Çavdêrên navneteweyî bi baldarî dişopînin
BBC di ragihandina xwe de bal kişand ser ku bangê nîqaşên nû li ser çareseriya siyasî ya pirsgirêka Kurd li Tirkiyeyê ji nû ve zindî kir û got ku çavdêrên navneteweyî vê pêşveçûnê bi baldarî dişopînin.
Al Jazeera: Firsend an jî ceribandinek nû?
Al Jazeera jî bang wekî gavek ku dikare deriyê nîqaşên nû veke nirxand û got ku encamên rast dê bi gavên pratîk ên siyasî û qanûnî bêne diyarkirin.
