Çalakiyên li rojhilatê Kurdistanê û Îranê bênavber didomin. Gelên Rojhilat û Îranê tevî hemû zextên rejîmê jî li ser pêyan e.
Çalakiyên li rojhilatê Kurdistanê û Îranê ku ji ber krîza aborî li Bazara Tehranê dest pê kirin û li bajarên din ên welat belav bûn, 11 roj in berdewam dikin. Li gorî daneyên nefermî di van çalakiyan de ku veguherî serhildana li dijî polîtîkayên tepeserkirinê yên rejîmê, zêdetirî 50 kesan ji aliyê hêzên rejîmê ve hatine kuştin, bi sedan birîndar hene û bi hezaran kes jî hatine binçavkirin. Xwendekarên zanîngehê û jin jî di xwepêşandanan de roleke girîng dilîzin.
Li gorî agahiyan duh bi şev navçeya Awdanan a girêdayî Îlamê û Melekşaha girêdayî Îsfahanê ketiye bin kontrola çalakvanan.
Pêvçûnên herî mezin li Şîraz, Îlam û Kirmanşahê çêdibin û ji 28ê Çileyê ve li van bajaran çalakî bênavber didomin. Hat hînbûn ku li Îlamê leşker jî tev li tepeserkirina çalakiyan bûne û hin cîhên bajêr sekvan hatine bicihkirin.
Li taxên Paramount, Molla Sadra, Zend, Zarehi, Amîr Kabîr û Moşhîrê ên Şîrazê çalakî didomin. Li van taxan barîkatên ji agir hatine danîn û gel li ber xwe dide. Li Zanîngeha Emîr Kabîr a Şîrazê jî xwendevan niha di çalakiyan de ne.
Li Kirmanşahê serhildan belavî hemû taxan bûye
Li Kirmanşahê şerê di navbera hêzên rejîmê û çalakvanan de didome. Li Meydana Mosadeghê ya li navendê, li Çerxerêya Ojaqê, li taxên Modares û Şeraparegê û sûk û bazarên bajêr şêr didome. Li bazarên Kûhsarî û Javanşîrê dikandaran dikanên xwe venekirin. Hêzên rejîmê bi gaza îsotê êrîş dikin lê gel bi paş ve gav naavêje. Her wiha li Zanîngeha Azad ya Kirmanşahê jî xwendekar di çalakiyê de ne û li gorî çavkaniyan çalakiyên vir gelekî dijwar in. Li navçeya Dolatabadê jî dikandar tev li grevê bûn û dikanên xwe venekirin. Hat zanîn ku li Rêya Hecî Muhammed Tagî jinek hatiye kuştin. Derbarê nasnameya jina hatiye kuştin de tu agahî nehatin bi dest xistin.
Li gelek bajaran çalakî didomin
Gelê bajarê Bojnûrdoyê yê eyaleta Xoresanê jî di roja 11emîn de derketin qadan û niha di çalakiyê de ne. Li ser Rêya Heyyam a Kazvînê jî çalakî didomin û di navbera hêzên rejîmê û çalakvanan de pevçûnên mezin derdikevin.
Li bajarên Fasa û Neyşabûrê jî çalakvan bi girseyî li kolanan in. Li bajarê Gonabadê li gelek taxan dûkêl radibe û di navbera hêzên rejîmê û çalakvanan de pevçûnên giran derdikevin.
Li bajarên Lordegan û Kermanê jî dikandaran dikanên xwe venekirin û tev li grevê bûn. Her wiha li ser Rêya Îmam ya Kermanê gel di çalakiyê de ne.
Her wiha çalakiyên li Tehranê jî didomin û li vir jî hat îdîakirin ku li gelek deverên bajêr sekvan hatine bicîhkirin.
