Çalakiya xwezaparêz û welatiyên Gimgimê ya konvedanê ya li dijî JESê di roja 35an de berdewam dike. Parlamentera DEM Partiyê Sumeyye Boz ku serdana nobedaran kir, wiha got: “Heke em qala civakeke demokratîk bikin, divê hemû ol, bawerî, gel û zayend li vir bi hev re, di hembêza xwezayê de jiyaneke azad û wekhev derbas bikin.”
Çalakiya konvedanê ya ku li gundê Xwarikê yê navçeya Gimgima Mûşê li dijî projeya Santrala Enerjiya Jeotermal (JES) hatiye destpêkirin, di roja xwe ya 35an de berdewam dike. Li qada çalakiyê pankartên ‘Ji Mêrdînê heta Vartoyê li dijî JESê em li aliyê jiyanê ne’, ‘Gelê Vartoyê santrala enerjiya jeotermal naxwaze, dest nede av û axa min’ û ‘Em xweza, bawerî û pêşeroja xwe diparêzin’ hatine daliqandin.
Parlamentera DEM Partiyê ya Mûşê Sûmeyye Boz, komeleyên ekolojiyê û nûnerên saziyên baweriyê yên ku ji bajarên Kurdistanê hatine, serdana kona berxwedanê kirin.
‘Serkeftin dê bibe ya gelê Gimgimê’
Di serdanê de parlamenter Sumeyye Boz axivî û diyar kir ku têkoşîna ekolojî û aştiyê girêdayî hev in û ev çalakî parçeyek ji têkoşîna jiyanê ye û wiha got: “Heke em qala civakeke demokratîk bikin, divê hemû ol, bawerî, gel û zayend li vir bi hev re, di hemêza xwezayê de jiyaneke azad û wekhev derbas bikin. Ev esas ji bo siyaset û îdeolojiya me tiştekî wiha ye ku mirovahî tu carî dê dev jê bernade. Rêya me hemûyan vekirî be. Serkeftin dê bibe ya gelê Gimgimê.”
‘Em bibin yek û welatê xwe rizgar bikin’
Rêvebera Komeleyên Elewiyan ên Demokratîk (DAD) Sûtiye Dapakli jî destnîşan kir ku ew ji bo axa xwe li ber xwe didin û ev tişt anî ziman: “Hevalên me ji Wan, Agirî û Mûşê ji bo piştgiriyê hatin. Bi piştgiriya xwe hêz dan me. Heke em hemû bibin yek, em dikarin welatê xwe li dijî talanê biparêzin. Werin em bibin yek û welatê xwe rizgar bikin.”
Piştî axaftinan, li qada çalakiyê bilûr hatin vedan û stran hatin gotin. Şêniyên gundê Virançê û gundikên wê nobeta kona berxwedanê ku heta serê sibê didome, dewr girtin.
