Şirnex – Yek ji cihê dîrokî jî Qesra Elo Dîno ku li ser Çemê Dîcleyê hatiyê çêkirin e. Bi demsala biharê re bi hemû xweşikiya xwe bala mirovan dikişîne sesr xwe. Heybeta Qesrê û Çemê Dîcleyê merivan matmayî dihêle.
Kurdistan bi xweza û dîroka xwe welatekî dewlemend û bêhempa ye. Kurdistanê mazûvaniya gelek şaristaniyan kiriye û bi dîrok û xwezaya xwe bi nav û deng e. Bi hatina demsala biharê re hemû rengîniya Kurdistanê xwe radixe berçavan. Yek ji cihê dîrokî jî Qesra Elo Dîno ya li gundê Bafê yê bi ser navçeya Hezexa Şirnexê ve ye, ku li qeraxê Çemê Dîcleyê hatiyê çêkirin. Qesr bi dîrok û xwezaya xwe bala mirovan dikişîne ser xwe. Ji aliyekî ve çem diherike û li aliyekî jî qesr xwe dide nîşandan. Her wiha Çiyayê Gabarê jî bi hemû heybet û xweşikiya xwe, xwe radixe ber çavan.
Robîn Hoodê Kurdan: Elo Dîno
Elo Dîno weke Robîn Hoodê Kurdan jî tê zanîn. Li gorî lêkolînên dîrokî Elo Dîno di sedsala 16an de jiyaye. Elo Dîno hem li dijî serdestên Kurdistanê û hem jî li dijî pergala axatiyê serî rakiriyê û têkoşiyaye. Çîroka Elo Dîno li Botanê bi nav û deng e û bûye mijara gelek stran û kilaman. Elo Dîno li dijî birçîbûn û xizaniya li herêmê serî radike û li ser Çemê Dîcleyê qesra xwe çêdike. Ji aliyê mîrektiyên wê demê ve gelek caran bi êrişan re rû bi rû dimîne lê ji ber ku cihê Qesrê li bilindahiyê ye, êriş encam nagirin. Lê di dawiyê de Elo Dîno tê girtin û wî diavejin Zindana Mem a Cizîrê. Ji ber îşkenceyan Elo Dîno di zindanê de jiyana xwe ji dest dide û çîroka wî belavî tevahî Botanê dibe. Niha jî li gundê Bafê gelek zarok navên xwe ji Elo Dîno digirin, yanî gelek kesan navê Elo Dîno li zarokên xwe kiriye.
Dîroka Qesrê û Keleha Bafê
Dîroka çêkirina Qesrê neyê zanîn lê ew jî di sedsala 16an de hatiyê çêkirin. Elo Dîno ji ber ku li dijî mîrektiyan serî rakiriye û di nav şer de bûye tê gotin ku bi zanebûn qesr li vî cihî çêkiriye. Cihê ku Qesr lê hatiyê çêkirin Keleha Bafê ye. Tê gotin ku Elo Dîno diwarên Qesrê bi destên xwe çêkirine. Qesra Elo Dîno bi hilweşandinê re rû bi rû maye. Keleha Bafê jî xwedî dîrokeke kevnar ê. Lê dîroka wê nayê zanîn. Keleha Bafê tevî sal û zeman bi ser re derbas bûne jî li ser pêyan maye. Li ser Keleha Bafê cihê genim û avê jî hene û tiştek jê nebûye. Ji ber ku ew dever hatiye valakirin, niha koçerên li wê deverê pez û tiştên xwe di şikeftên Kelehê de bicih dikin. Her wiha tê xuyakirin ku kesên li xezîneyê digerin, her cihê Kelehê kolan e û û rûxandin e.
Çemê Dîcleyê di nav çiyayan de bi heybet diherike
Çemê Dîcleyê ku di nav çiyayan û kêleka Qesrê de diherike dîmenên xweşik bi xwe re derdixe holê. Çiyayê Gabarê jî li miqabilî çem tê xuyakirin û ev yek jî dewlemendiya xwezaya herêmê nîşan dide. Li derûdora Çemê Dîcleyê reng û bejna çiyayan, dar û devî û xweşikiya xwezayê bala mirovan dikişîne ser xwe. Her wiha balkêş e ku li ser çem li miqabilî Keleha Bafê ji aliyê Walitiya Şirnexê ve îsal kalekola leşkerî hatiye çêkirin. Her çiqas kalekol hatibe çêkirin jî lê dîsa jî dewlemendî û xweşikiya xwezayê, keleha Bafê, Qesra Elo Dîno û Çemê Dîcleyê hêjayî serdan û dîtinê ye.
