Veysî Aktaş ê ku tevlî civîna gel a Nisêbînê bûyî diyar ku armanca Tevgera Azadiyê tifaqa Kurd û Tirkan e û bi vê yekê dê li Rojhilata Navîn civaka demokratîk were avakirin.
Li navçeya Nisêbînê ya Mêrdînê bi tevlêbûna Veysî Aktaş ê ku 10 salan bi Rêberê Gelê Kurd Abdûllah Ocalan re li Girtîgeha Îmraliyê mayî, Parêzerê Abdûllah Ocalan Mazlûm Dînç, Hevşaredara Êlihê Gulistan Sonuk û sedan welatiyan Civîna Aştî û Civaka Demokratîk hat lidarxistin. Wêneyên Abdûllah Ocalan di salona taybet a civîn pêk hatî de hatin daliqandin. Civînê bi rêzgirtina ji bo cangoriyên azadiyê destpê kir. Di civînê de diruşmên, ‘Şehîd namirin’ û ‘Bijî Serok Apo’ hatin berzkirin. Piştî rêzgirtinê Hevşaredara Êlihê Gulistan Sonuk derbarê armanca civînê de agahî dan.
Gulistan Sonukê di axaftina xwe de diyar kir ku encamên civînan ê weke rapor werin amadekirin û wiha axivî: “Di pêvajoya Aştî û Civaka Demokratîk de hêviyên gelê Kurd, nêzikatî û xwedîlêderketina gelê Kurd gelekî grîng e. Gelê Kurd bi salan e têkoşîna demokrasiyê dide û di avakirina aştiyê de jî gelekî bi israr e.”
Tevgera Azadiyê dixwaze tifaqa gelan pêk bîne
Piştî axaftina Gulistan Sonukê civînê ji çapemeniyê re girtî dewam kir. Di beşa ji çapemeniyê re girtî de Veysî Aktaş û Mazlûm Dînç nirxandin kirin û di nirxandinên xwe de anîn ziman ku armanca herî girîng a Tevgera Azadiyê ew e ku tifaqa Kurd û Tirkan saz bikin û di Rojhilata Navîn de jiyaneke demokratîk ava bikin.
Gel pêşniyarên xwe ji bo pêvajoyê anîn ziman
Piştî nirxandinên Aktaş û Dînç welatiyên tev li civînê bûne derbarê pêvajoyê de pêşniyarên xwe kirin û di aliyê civakî û siyasî de rexneyên xwe anîn ziman. Her wiha welatiyan diyar kir ku pêwîstiya herî lezgîn a gelê Kurd û gelan aştî ye.
Piştî nirxandinan civîn bi dawî bû.
