Komeleya Avestayê bi boneya Cejna Zimanê daxuyaniyek da. Di daxuyaniyê de hat destnîşankirin ku bi banga Abdullah Ocalan a ‘Aştî û Civaka Demokratîk’ xwedîlêderketina li zimanê Kurdî gihîştiye asteke bilind û ev bang ji bo mîsogerkirina statû û mafên hiqûqî mîlatek e.
Komeleya Lêkolînên Ziman û Çandê ya Avestayê, bi boneya 15ê Gulanê Cejna Zimanê Kurdî li ber avahiya komeleyê daxuyaniyek dan çapemeniyê. Di daxuyaniyê de, pankarta “Statuya Kurdî, perwerdehiya bi Kurdî” hat vekirin û gelek caran dirûşmên “Bê ziman jiyan nabe” û “Zimanê me rûmeta me ye” hatin berzkirin. Daxuyanî li ser navê girseyê ji aliyê Sinan Zencir ve hat xwendin.
‘Banga Ocalan rê li ber statuyê vedike’
Sînan Zencîr destnîşan kir ku gelê Kurd bi banga Rêber Abdullah Ocalan a ‘Aştî û Civaka Demokratîk’ nîqaşên li ser rakirina astengiyên li hember çand û ziman xurt kirine û got: “Em di vê bîr û baweriyê de ne ku dê ev banga Rêber Abdullah Ocalan bibe sedema zindîkirina ruhê neteweyî yê aştiyane û civaka demokratîk. Dê rê li ber mîsogerkirina nasname, xwebûn, statû, mafê siyasî û hiqûqî veke.”
Têkoşîna li dijî polîtîkayên bişaftinê
Zencîr bal kişand ser polîtîkayên bişaftinê yên li ser zarokan û wiha berdewam kir: “Di sedsala 21êmîn de, hîn jî li ser bi milyonan zarokên Kurd polîtîkayên bişaftinê bi awayekî hovane tên meşandin. Li gorî peymanên navneteweyî, ev pêkanîn sûcên li dijî mirovahiyê ne. Gelê Kurd ji destpêka Komarê ve bi înkar û tunekirinê re rû bi rû maye, lê li hemberî vê her tim têkoşiya ye.”
‘Statuya Kurdî Perwerdehiya bi Kurdî’
Zencîr di daxuyaniyê de diyar kir ku ew ê di asta herî bilind de xwedî li banga ‘Aştî û Civaka Demokratîk’ derkevin û wiha bi dawî kir: “Em ê têkoşîna xwe ya ji bo pêşvebirina zimanê Kurdî berfireh bikin. Em ê bi hemû saziyan re dirûşmeya ‘Statuya Kurdî, Perwerdehiya bi Kurdî’ bidomînin. Gelê Kurd dê jiyaneke bêyî ziman û nasname tu carî nepejirîne.”
Daxuyanî bi çepik û dirûşmeyan bi dawî bû.
