Rojnameger Umêd Beroşkî ê ku dihat payîn di 30ê Tîrmeha 2025an de were berdan, berdana wî 6 mehan hat paşxistin.
Parêzerê rojnameger Umêd Beroşkî daxuyand ku biryar piştî du rojên din cezayê Umêd Beroşkî biqediya û bihata azadkirin, lê berdana wî ji bo 6 mehên din hat paşxistin.
Rojnameger û çalakvanên devera Behdînanê Umêd Beroşkî di 23yê Çileya 2024an de bi rêya facebookê ragihandibû ku ‘Mela Nezîr ji aliyê hêzên girtîgeha Zirkanê ve hatiye revandin, lê wî nebirine girtîgehê û çarenûsa wî nediyare’.
Piştî wê, berpirsên girtîgeha Zirkan li ser Umêd Beroşkî gilî tomarkirin. Piştî du rûniştinên dozê, 6 meh cezayê girtîgehê yê hatî paşxistin bi ser de hate sepandin ku ceza nayê bi cih anîn heta ku sucek din tê kirin. Ango ger di nava sê salan sucek din were pêkanîn, wê demê cezayê hatî dayîn dê were pêkanîn.
Di 23yê Çileya 2024an de Dezgeha Çaksaziyê ya Duhokê li dijî Umêd Beroşkî bi tometa ‘heqaretê’ gilî tomar kir. Piştre di 30ê Çileya 2025an de, Dadgeha Duhokê şeş meh cezayê girtîgehê li Umêd Beroşkî birî û ji bo girtîgeha Zirkan hat şandin.
Parêzerê Umêd Beroşkî, Rêving Yasîn ji Rojnewsê re ragihand ku tevî ku biryar bû di 30ê Tîrmeha 2025an de cezayê Umêd Beroşkî temam bûya û bihata azadkirin, lê ji ber ku divê cezayê wî yê berê were bicîhanîn, berdana wî ji bo şeş mehên din hat paşxistin.
Rojnameger Umêd Beroşkî di 18ê Tebaxa 2020an de bi tometa ‘metirsî li ser asayîşa niştîmaniyê’ hate binçavkirin û 6 giliyên cuda li ser hatibûn tomarkirin. Bi 3 sal cezayê girtîgehê hate mehkûmkirin û di 22yê Sibata 2022yan de hat berdan. Lê piştî serbestberdana wî, ew carekê hate binçavkirin û çend caran ji bo demek kurt hate girtin, pişt bi kefalet hat berdan.
Navenda Metro nîgeraniya xwe li ser nûkirina cezayê girtîgehê yê şeş mehî yê li dijî rojnamevan Umêd Beroşkî ji aliyê Dadgeha Duhokê ve anî ziman û daxwaz kir ku doza wî li gorî Yasaya Rojnamegeriyê were çareserkirin.
