Şirnex – Hevseroka DEM Partiyê ya Şirnexê Nûrcan Alturk ku di meşa li dijî êrişên dewleta tirk li navçeya Cizîrê hate lidarxistin de axivî, wiha got: “Bêdengiya li dijî van êrişan rê li ber komkujiyan vêdike.”
Bi pêşengiya Rêxistina Partiya Herêmên Demokratîk (DBP) a Şirnexê li navçeya Cizîrê ya Şirnexê li dijî êrişên komên paramîlîter ên giredayî dewleta tirk ên li ser Bakur û Rojhilatê Suriyeyê meşek hat li darxistin. Tevgera Jinên Azad (TJA), rêxistinên Partiya Wekhevî û Demokrasiyê ya Gelan (DEM Partî) ên navçe û navenda Şirnexê, Meclisa Dayikên Aştiyê û gelek kes tev li meşê bûn. Girseyê pankarta ku li ser, “Rojava rûmeta me ye” dinivisî hilgirt û bi dirûşmên, “Bijî berxwedana Rojava”, “Rojava rumeta me ye”, “Jin jiyan azadî” û “Bi berxwedanê em ê serbikevin” meşiyan. Her wiha girse bi dowîzên ku li ser, “Rojava Roja me ye”, “Silav ji Botanê siwar ketin berxwedanê” û “Şoreşa Rojava şoreşa jinê ye” dinivisî hilgirtin û bi dirûşm û çêpikan li ber deriyê avahiya DEM Partiyê ya navçeya Cizîrê heta Xaçerêya Dortyolê meşiya.
‘Têkoşîna gelê Kurd wê serbikeve’
Li vir metna daxuyaniya hevpar hat xwendin. Beriya daxuyaniyê Hevserokê DEM Partiyê yê Şirnexê Abdullah Gungen axivî. Abdullah Gungen anî ziman ku bi destê komên çekdar li Suriyeyê û Bakur û Rojhilatê Sûriyeyê li dijî gelan qetlîam pêktên û wiha got: “Dema mijar dibe destkêftiyên gelê Kurd û êrişên li ser Kurdan hemû cihan ker û lal e. Em êrişên li ser Bakur û Rojhilatê Suriyeyê şermezar dikin. Ew êriş bi ser nakêvin. Çi dibe bila bibe têkoşîna gelê Kurd wê serbikeve. Heta gelê Kurd negihije statuyeke azad û hemû mafên gerdunî bi dest nexin têkoşîna me wê berdewam bike. Dîrok dê kesên ku alîkariya çeteyan dikin jî binivisîne.”
‘Xwedî li Rojava derbikevin’
Piştî axaftina Abdullah Gungen Hevseroka DEM Partiyê ya Şirnexê Nurcan Alturk metna daxuyaniya hevpar xwend. Nurcan Alturk destnîşan kir ku li dijî êrişên ser herêmên Bakur û Rojhilatê Suriyeyê pêwîste gavên şenber bên avetin û ev tişt gotin: “Ji bo nebin hevkarê van êrişan divê dengê xwe bilind bikin. Rojava li dijî DAIŞê zarok, jin û hemû welatiyên Suriyeyê parast. Ji bo wê jî divê xwedî li Rojava bê derketin û gavên şenber bên avetin. Bêdengiya li dijî van êrişan rê li ber komkujiyan vêdike. Li dijî van êrişan em têkoşîn û berxwedana xwe mezintir bikin û ji bo pêşeroja xwe xwedî li modela demokratik û azad derbikevin.”
