Hevserokê Giştî yê DBPê Keskîn Bayindir li Nisêbînê li dijî êrişên Tirkiyeyê axivî û anî ziman ku Tirkiye welatiyên sivîl dikuje û got: “Dilê bi milyonan Kurd ji bo Rojava lê dide. Dil û hişê gelê Kurd yek e. Heta serkêftin û azadiyê em ê li ber xwe bidin.”
Partiya Herêmên Demokratik (DBP), Tevgera Jinên Azad (TJA) û Partiya Wekhevî û Demokrasiyê ya Gelan (DEM Parti), li dijî êrişên Tirkiyeyê û komên paramîlîter ên giredayî wê li ser Bakur û Rojhilatê Suriyeyê û kuştina welatiyên sivîl li Bendava Tişrînê meşek li dar xist. Hevserokê Giştî yê DBPê Keskîn Bayindir, parlamenterên DEM Partiyê, rêxistinên DBP û DEM Partiyê yên Mêrdîn, Şirnex, Rihayê, Dayikên Aştiyê, nûnerên rêxistinên sivîl sivîl û gelek welatî tev li çalakiyê bûn.
Girse li Parka Aştiyê ya Nisêbînê civiya û xwest ji parkê heta ser sînorê Nisêbîn-Qamişlo bimeşe. Polîsan li parkê girseyê dorpêç kir û meşê astneg kir. Girseyê bi berzkirina dirûşmeyan û stranan bertek nîşanî astengiyê da. Girseyê wêneyên rojnameger Cîhan Bîlgîn û Nazim Daştan, dowîzên bi nivîsên “Rojava hebûna me ye”, “Jin jiyan azadî”, “Bêdengî mirin e berxwedan jiyan e” hilgirtin, û dirûşmeyên “Bijî berxwedana Tişrînê”, “Rojava rûmeta gelê Kurd e” berz kirin û stran gotin.
Girseyê dorpêç hilweşand
Gel bi bertekên xwe dorpêça polîsan hilweşand û li wir daxuyanî da. Di daxuyaniyê de pankarta bi nivîsa “Rojava rûmeta me ye” û pankarta ku wêneyên şanogerê Kurd Bavê Teyar û siyasetmedara Kurd Menice li serê hebû ya bi nivîsa”Şehîdên Tişrînê nirxên gelê me û pêşeroja me ne” hatin hilgirtin.
‘Dilê bi milyonan Kurd ji bo Rojava lê dide’
Di daxuyaniyê de Hevserokê Giştî yê DBPê Keskin Bayindir axivî. Keskîn Bayindir bertek nîşanî dorpêçkirinê da û wiha got: “Li ser Bendava Tişrînê sivîl, zarok, rojnameger û şanoger tên kuştin. Ev yek sûcê li dijî mirovahiyê ye. Gelê Kurd wê li dijî vê yekê têkoşîna xwe bidomîne. Li bakurê Kurdistanê dilê bi milyonan Kurd ji bo Rojava lê dide. Heya statuya Rojava neyê mîsogerkirin û dorpêça Tirkiyeyê neyê hilweşandin, têkoşîna me wê bidome. Ev desthilat agirê şer gur dike. Em ji dixwazin rêya aştî û azadiyê li pêş bikeve. Ev îradeya çareseriyê ye. Gelê Kurd li dijî vê zîhniyeta ku dixwaze me di bin dorpêçê de bihêle wê têkoşîna xwe bidomîne. Gelê Kurd îro li Rojhilata Navîn temsîla wekheviyê dike.”
‘Ev peyam ji bo hemû kesî firset e’
Keskîn Bayindir bal kişand ser hevdîtina dawî ya bi Rêberê PKKê Abdullah Ocalan re û wiha domand: “Cara duyemîn bi rêzdar Ocalan re hevdîtin pêk hat. Birêz Ocalan dîsa peyam da me hemûyan û ev ji bo me hemûyan firset e. Bila desthilat vê firsetê li hewa nehêle. Lê hûn Rojava bombebaran dikin. Rojnamegeran bombebaran dikin. Em vê qebûl nakin. Gelê Kurd xwedî li îradeya birêz Ocalan derdikeve. Lê hûn îradeya careseriyê li pêş naxin. Lê gelê Kurd wê heta dawiyê xwedî li îradeya xwe derbikeve. Em ê mafê xwe bidestbixin. Hûn çi dikin bikin Rojava wê statuya xwe mîsoger bike. Ji bilî Tirkiyeyê tu kes dijminatiyê Rojava û jiyana wir nake. Dibêjin em ne dijminê gelê Kurd in lê pratîka we dijminatiya gelê Kurd dike.”
‘Ev bêdengiya we şirîkatiya sûcê tê kirin e’
Keskîn Bayındir bang li saziyên navneteweyî jî kir û axaftina xwe wiha bi dawî kir: “Li ber çavê we sûcê şer ê li dijî mirovan pêk tê. Li ku ev biryar tê dayin diyar e. Em ê dinyayê rakin ser lingan. Li wir jin û zarok tên kuştin. Em vê qebûl nakin. Ev bêdengiya we dibe şirîkê sûcê tê kirin. Îro ev gel dixwaze pêşî li şer were girtin. Dibêje bila şer bi dawî bibe. Duh îradeya careseriyê carek din li Îmraliye li pêş ket. Ev gel ji bo aştiyê jî ji bo têkoşînê ji amade ye. Em e bi ser bikevin. Ev gel her tim bi êrişan re rû bi rû dimîne û bi êrişan re ji xew şiyar dibe. Gelo wê bi vê zîhniyeta qirêj çawa aştî li pêş bikeve? Bangawaziya me ji gelê me re jî ev e; heta dawiyê em ê xwedî li Rojava derbikevin. Gelê Kurd li her derê yek e. Rojava jî Kurdistan e. Li Tirkiyeyê hûn ê bêjin em e pirsgirêka Kurd çareser bikin lê hûn li Rojava sivîlan dikujin. Em ve yekê qebûl nakin. Ev siyaseteke qirêj dimeşînin. Dilê gelê Kurd jî hişê gelê Kurd jî yek e. Heta serkeftinê û azadiyê em ê li ber xwe bidin.”
Daxuyanî bi berzkirina dirûşmeyan bi dawî bû. Girse piştî daxuyaniyê ji Parka Aştiyê heta ber avahiya DEM Partiyê ya Navçeya Nisêbînê meşiya.
