Amed – Aktîvîsta TJAyê Ayla Akat Atayê destnîşan kir ku bi pêkneanîna peyama Rêberê Gelê Kurd Abdullah Ocalan a di sala 2013an Tirkiyeyê gelek tişt winda kirin û wiha got: “Bi rûniştinê ev pêvajo naçe serî. Divê îro her kes tev li vê pêvajoyê bibe, xebatan bimeşîne.”
Konferansa Parlamenterên Jin ên Kurd ku di pêşengtiya Tevgera Jinên Azad (TJA) de tê lidarxistin bi dirûşma “Jin siyaseta demokratîk dimeşînin, civaka demokratîk avadikin” li Çand Amedê (Navenda Kongre û Çandê ya Şaredariya Bajarê Mezin a Amedê) ya li navçeya Yenîşehîrê ya Amedê berdewam dike.
Aktîvîsta TJAyê Ayla Akat Ata ku tev li konferansê bû derbarê banga “Aştî û Civaka Demokratîk” a Rêberê Gelê Kurd Abdullah Ocalan de ji ajansa me re axivî û destnîşan kir ku bi pêkneanîna peyama Rêberê Gelê Kurd Abdullah Ocalan a di sala 2013an Tirkiyeyê gelek tişt winda kirin.
‘Fikir û ramanên Rêberê Gelê Kurd Abdullah Ocalan neguherîne’
Ayla Akat Atayê diyar kir ku ji berê ve heta niha fikir û ramanên Rêberê Gelê Kurd Abdullah Ocalan neguherîne û wiha got: “Ji sala 1993yan heta îro Birêz Abdullah Ocalan dibêje ‘me bi keyfxweşî çek negirtine destê xwe. Têkoşîna me li ser xwebûna me ye. Heta îro xwebûna me nayê qebûlkirin, em ji bona wê di nava têkoşîna çekdarî de bûne.’ Îro em li ser axaftinên wî yên berê û îro difikirin tiştek neguherî ye. Birêz Abdullah Ocalan dîsa heman tiştan dibêje. Dibê ‘Heke hebûna me qebûl bibe, hûn bibêjin Kurd bi mafên xwe hene ne hewce ye Kurd bi têkoşîna çekdarî xwe bidin qebûlkirin.’ Ji bona wê em îro di nava rojên dîrokî de ne.”
‘Ji bo ev pirsgirêk çareser bibe me bedelên mezin dan’
Ayla Akat Atayê bi lêv kir ku di konferansa jinan de jî mijara wan pêvajoya heyî ye û wiha domand: “Bi saya vê pêvajoyê em bi jinên parlamenter, siyasetmedar ên ji her çar aliyê Kurdistanê re hatin bahev. Çawa ku fikrên Birêz Abdullah Ocalan neguherîne, fikrên jinên Kurd jî neguherîne. Me rojên berê jî gotibû, em bi canê xwe, ruhê xwe dixwazin ev mesele çareser bibe, ji bo ku ev pirsgirêk çareser bibe em dikarin bedelên mezin jî bidin. Banga Birêz Abdullah Ocalan a 27 Sibatê gihişte me, gelên bindest ên cîhanê, desthilatên cîhanê. Ji 27ê Sibatê heta îro çawa rojeva Tirkiyeyê, ya Rojhilata Navîn guherandiye em li ser bisekinin. Em bizanibin ku ev bang bangeke çiqas dîrokî ye. Ji îro şûn ve jî hêvî dikin ku bikarin bersiva vê bangê bidin.”
‘Desthilata Tirkiyeyê di nava 12 salan de wijdana xwe winda kir’
Ayla Akat Atayê anî ziman ku bi pêkneanîna peyama Rêberê Gelê Kurd Abdullah Ocalan a di sala 2013an de Tirkiyeyê gelek tişt winda kirin û wiha dirêjî da axaftina xwe: “Ne tenê ciwan û mirovên xwe, mirov dikare bêje wijdana xwe winda kir. Ji ber ku şer çiqas dirêj be mirov jî ewqas bêwijdan dibe. Ne gelê Tirkiyeyê lê desthilata Tirkiyeyê di nava van 12 salan de wijdana xwe jî winda kir. Em axaftina Birêz Abdullah Ocalan a di sala 1993yan de guhdar bikin û ya îro guhdar bikin tiştek nehatiye guherîn. Lê desthilatên Tirkiyeyê li ser vê fikrê siyaset nedane meşandin. Li ser tunebûna gelê Kurd siyaset dane meşandin. Îro gelê Kurd çima saziyên xwe avakirine. Ji ber ku ne zimanê me ne çanda me qebûl nebûye. Ji ber wê her saziyên xwe me jinûve avakirine. Di nava van 32 salan de gelê Tirkiyeyê bi hev re winda kir. Lê desthilatê wijdana xwe winda kir. Ji ber ku li ser xwîna ciwanên gelê Kurd û Tirk siyaset meşandin. Îro em dikarin bêjin ku êdî ji îro û şûn ve divê li ser xwîna ciwanan siyasetê nekin. Divê ji îro û şûn ve weke birêz Devlet Bahçelî herkes bizane ku yekitiya gelên Tirkiyeyê çiqas girîng e. Bizanibin ku aştiyeke di nava Tirkiyeyê de ava bibe çiqas taybet e. Beriya çend rojan Dewlet Bahçelî got ‘Heke Tirkiye nikaribe aştiya xwe ava bike, nikare li ser aştiya Rojhilata Navîn û cîhanê jî biaxive.’ Divê mirov li ser vê rastiyê bifikire. Ji îro û şûn ve jî siyaseta xwe li ser vê fikrê bidin meşandin.”
‘Bi rûniştinê pêvajo naçe serî’
Ayla Akat Atayê destnîşan kir ku jin pêşengên vê pêvajoya heyî ne û axaftina xwe bi van gotinan bi dawî kir: “Ciwan û jinên Kurd, gelên bi hev re dijîn destê xwe bidin hevdû di serî de li Kurdistanê dewletên em di nav de dijîn em dikarin civakeke demokratîk bidin avakirin. Banga me ji hemû civaka Kurdistanê re ev e, bi rûniştinê ev pêvajo naçe serî. Divê em heft roj bîst û çar saet li ser vê pêvajoyê bifikirin çi ji destê me were em bikin. Divê îro herkes tev li vê pêvajoyê bibe, xebatan bimeşîne. Birêz Abdullah Ocalan firsendeke dîrokî pêşkeş kiriye, gelên Rojhilata Navîn û gelên Kurd û Tirk dikarin bi xebatên xwe bersiva vê bangê bidin.”
