Xwişka Gulistan Dokû, Aygul Dokû diyar kir ku ji hevalê Mûstafa Turkay Sonel, Ûmût Altaş hîn bûne ku xwişka wê Mûstafa Turkay Sonel kuştî ye û xwest waliyê wê deme Tûncay Sonel ji peywîrê bê girtin û darizandin.
Xwendekara pola 2yan a Beşa Pêşxistina Zarokan a Zanîngeha Mûnzûrê ya Dêrsimê Gulistan Dokû (21), di 5ê Çileya 2020an de hate windakirin û ji wê rojê heta niha tu agahî jê nayên girtin. Di 13ê Nîsanê di çarçoveya lêpirsîna dosyaya Gulistan Dokuyê de 13 kes hatin binçavkirin. Di nav binçavkiriyan de kurê waliyê demê yê bajar Tuncay Sonel ê bi navê Mûstafa Turkay Sonel, parastvanê walî û midûrê emniyetê yê berê jî hene. Piştî geşedanên nû yên di lêpirsîna Gulistan Dokû ya hatiye destpêkirin de malbata Dokû li ber Edliyeya Dêrsimê daxuyanî da çapemeniyê. Ferdên malbatê û parêzerê malbatê Alî Çîmen tev li daxuyaniyê bûn.
Xwişka Gulistan Dokûyê, Aygul Dokû ya li ser navê malbatê axivî têkildarî bûyerê agahiyên nû dan. Aygul Dokû da zanîn ku ji hevalê Mûstafa Turkay Sonel ê kurê waliyê demê Tûncay Sonel e, Ûmût Altaş hîn bûne ku xwişka wê Mûstafa Turkay Sonel kuştî ye. Aygul Dokûyê ev agahî dan: “Ûmût Altaş 2-3 caran li min digere, dixwaze vebêje lê cesaret nake. Pişt re diçe nîşeyekê ku li ser ‘Kesê ku Gulistan kuştî ye, Mûstafa Turkay Sonel ê kurê Walî Tûncay Sonel e. Dozgerê wê demê zêde bi wê nîşeyê re mijûl nabe. Pişt re em çûn ku bi malbatê re hevdîtinê bikin. Beriya ku em rûnin ji me re gotin ‘Xwedê rehma xwe lê bike’. Em li wir ketin nava şik û gumanan. Heta niha kesekê tiştekî wiha negotibû. Me jê re got ‘Çima tu tişteke wiha ji me re dibêjî?’ Em bi ser de çûn dayîka wî ji me re got ‘yekane sûcê kurê min ew e ku bi kurê walî re hevalînî kiriye. Me kurê xwe gelek caran hişyar kir, me got ev ne kesekî saxlem e. Kurê min bi wî re bû heval û serê xwe şewitand.’”
‘Heke Ûmût nebûya min navê kurê Tuncay Sonel nedizanî’
Aygul Dokû bi lêv kir ku Ûmût Altaş reviya ye Amerîkayê û wiha got: “Me ji dayîk û bavên wî re got ‘Heke kurê we reviya be Amerîkayê kurê we Gulistan kuştî ye.’ Ev yek qet qebûl nekirin. Pişt re nimreya Ûmût dan, ez lê geriyam. Ûmût Altaş dema ev bûyer qewimî hêj 18 salî bû. Nekariye vê bûyerê ragire. Ew nîşe biriye daniye Baroyê. Hewl daye ku xwe bigihîne min. Tûncel Sonel ew demildest şandiye Amerîkayê. Ûmût got ‘Min nekiriye lê ez ê ji te re bibim alîkar, 2-3 rojan wext bide min.’ Ûmût da bi min re biaxive. Malbata Ûmût û kesên li vê derê nehiştin biaxive. Pişt re me nekarî xwe bigihînin Ûmût. Ûmût dibêje dema Gulistan hate kuştin di wesayîtê de bû. Dema hate kuştin Ûmût li cem wan bû. Heke Ûmût kujer bûya ji min re nedigot ‘ez ê alîkariya te bikim’. Heke Ûmût nebûya min navê kurê Tûncay Sonel nedizanî.”
Aygul Dokû diyar kir ku beriya xwişka wê were kuştin ew xistine kemînê û xwest ku Tûncay Sonel demildest ji peywîrê bê girtin û darizandin.
