Wezaretên derve yên Amerîka, Fransa û Sûriyeyê derbarê rewşa Sûriyeyê de daxuyaniyeke hevbeş dan û diyar kirn ku dê di demek nêzîk de danûstandinên di navbera nûnerên Bakur û Rojhilatê Sûriyeyê û Hikûmeta Veguhêz de li Parîsê dest pê bikin.
Li paytexta Fransayê Parîsê, di navbera Wezîrê Derve yê Hikûmeta Veguhêz ya Sûriyeyê Esed El Şeybanî, Wezîrê Karên Derve yê Fransayê Jean-Noël Barrot û Nûnerê Taybet ê Amerîkayê yê Sûriyeyê Thomas Barrack de civînek pêk hat. Li gorî ajansa SANAyê her sê alî li ser hin xalan li hev kirine. Xalên li ser hatine lihevkirin wiha ne:
– Beşdarbûna bilez di hewldanên bingehîn de ji bo misogerkirina serkeftina rêveçûna veguhastinê li Sûriyeyê, misogerkirina yekitî, aramî û serweriya welêt li ser tevahiya axa wê.
– Pabendbûna bi hevkariya hevbeş ji bo têkoşîna li dijî terorê bi hemû şêweyên wê û piştgiriya şiyanên dewleta Sûriyeyê û saziyên wê ji bo rûbirûbûna astengiyên ewlehiyê.
– Piştgiriya hikumeta Sûriyeyê di rêveçûna veguhastina siyasî de ku armanca wê pêkanîna lihevkirina nîştimanî û xurtkirina hevgirtina civakî ye, nexasim li Bakur û Rojhilatê Sûriyeyê û parêzgeha Siwêdayê.
– Ji bo temamkirina peymana 10ê Adarê bi giştî, di demeke herî nêz de li Parîsê di navbera hikumeta Sûriyeyê û Hêzên Sûriya Demokratîk (QSD) de divê şêwir were lidarxistin.
– Di çarçoveya encamên raporên zelal de, di nav de rapora dawîn a komîteya neteweyî ya serbixwe ya ji bo aşkerakirin û lêpirsînên bûyerên dawîn ên li perava Sûriyeyê, piştgiriya hewldanên ji bo hesapxwestina ji kesên tundî kiriye.
– Divê were piştrastkirin ku dewletên cîran tu gefên li dijî îstîqrara Sûriyeyê nexwin û li beramber wê jî divê Sûriye pabend be ku tu gefên ewlehiyê li cîranên xwe nexwe, da ku îstîqrara herêmê bi tevahî were parastin.
