Amedsporê derbarê firotina bilêdên maçên xwe de ku di demên dawî de bûn mijara nîqaşê, daxuyaniyeke nivîskî weşand û hûrgiliyên belavkirina bilêdan bi raya giştî re parve kir.
Firotina bilêdên Amedsporê yên li sehaya xwe di demeke kurt de diqedin. Ev rewş di nava raya giştî ya futbolê de bû sedema nîqaşan. Li ser van nîqaşan, Amedsporê daxuyaniyeke nivîskî weşand.
Amedsporê destnîşan kir ku di pergala Passoyê de ji aliyê wan ve tu pirsgirêkeke teknîkî yan îdarî tune ye û firotin li gorî rêzikan tên meşandin.
Di yek carê de 100 hezar serlêdan çêbûn
Amedsporê ragihandin ku di dema destpêkirina firotina biledên maça Amedspor-Îstanbûl Başakşehîr FKyê de, tenê ji bo rûpela vê maçê zêdetirî 100 hezar kesî di heman demê de xwestine bikevin pergalê. Ji ber vê hejmar û daxwaza zêde, bilêd di demeke pir kurt de qediya ne.
Kapasîteya stadyûmê û hejmara bilêdan
Amedsporê diyar kir ku kapasîteya bikarhêner a stadyûmê bi giştî 30 hezar 481 kes e lê nayê wateya ku ev hejmar di her maçê de ji bo firotina bilêdan tê vekirin.
Belavkirina vê kapasîteya 30 hezar 481 kesan bi vî rengî ye:
“Kombîneyên hatine firotin: 12 hezar û 923
Loca: 511
Protokol: 357
Tribuna Çapemeniyê: 432
Bilêdên ku bi giştî hatine firotin: 9 hezar û 254
Kontenjana Koma Alîgiran: 2 hezar 600 (Li pişt Kaleya Başûr û quncê Başûrrojhilat)
Kontenjana Tîma Mêvan: hezar û 518
Tribuna Astengdaran: 160
Qada ji neçariyê ji TFFyê re hatiye veqetandin: 85
Midûriyeta Werzişê û Ciwanan a Bajar: 410
Personelên Ewlehiyê: 200
Çalakiyên Berpirsiyariya Civakî û Îstîşareyê: 150
Sponsorî: 20
Xebatkarên Kulûbê û Lîstikvan: 136 (Tîma A, binesazî û tîma jinan)
Delegasyon: 288
Qadên Ewlehiyê û Tamponê: 1 hezar 437
Ji Bo Ewlehiyê Hezar û 437”
Beşek ji wan hezar û 437 koltukên ku ji aliyê yekîneyên ewlehiyê ve ji bo tedbîran hatine veqetandin, li gorî şert û mercên maçê dikarin dîsa werin vekirin û bên firotin.
9 Hezar û 254 bilêd hatin firotin
Ji bo maça Amedspor-Îstanbûl Başakşehîr FKyê, di qonaxa ewil de hejmara bilêdên ku ji bo firotina giştî hatine vekirin 9 hezar û 254 hebin.
Daxwaza bilêdan a alîgiran
Amedsporê da zanîn ku ji bo ku bilêd bi awayekî adilane bigihin destê zêdetirî alîgiran, mafê kirîna bilêdê yê her kesî ku berê 5 bû, daxistine yek kesî. Amedsporê her wiha hişyar kir ku hin kes bi rêya medyaya civakî alîgiran dixapînin, ji ber vê yekê divê alîgir li derveyî kanalên fermî tu carî bilêdan nexwazin û serî li qenalên fermî bidin.
