Amed – Hevserokên DEM Partî û DBPê yên Amedê banga tevlibûna mitîngê li gel kirin û gotin: “ Werin em ji bo azadiya Rêberê Gelê Kurd beşdarî mîtînga 4ê Çile bibin û dengê xwe bilind bikin.”
Platforma Saziyên Demokratîk dê di 4ê Çileyê de li Qada Îstasyonê ya Amedê bi daxwaza azadiya fîzîkî ya Rêberê Gelê Kurd Abdullah Ocalan, mitînga “Hêvî û Azadiyê” li dar bixe. Mitîng, dê saet di 13.00ê de dest pê bike. Ji bo mitînga “Hêvî û Azadiyê” partiyên siyasî, sazî û dezgehên sivîl dest bi xebatên amadekariyê kirine û ji bo mitîngê dixebitin.
Hevseroka Partiya Heremên Demokratîk (DBP) ya Amedê Rûçem Vefa Elyakût û Hevseroka Partiya Wekhevî û Demokrasiyê ya Gelan (DEM Partî) ya Amedê Gulşen Ozer derheqê xebatên mitîngê de axivîn.
‘Heya Serokê me azad nebe pêvajo baweriyê nade’
Gulşen Ozerê bal kişand ser gavneavêtina dewletê û got: “Pêvajo li ser banga birêz Ocalan a Aştî û Civaka Demokratîk pêş ket. Lê dewletê hîn gavên şênber neavêtine. Ji ber vê yekê dema ku em dibêjin em ê bingeha aştiyê ava bikin gel dibêje ‘Heya Serokê me azad nebe ev pêvajo baweriyê nade me.’ Em jî ji bo azadiya fizîkî ya Abdullah Ocalan di 4ê Çileyâ 2026an de mitinga Hêvî û Azadiyê li dar dixin. Em bang li gelê xwe dikin ku em bi hevre azadiya birêz Abdullah Ocalan û azadiya hemû gelan bixwazin.”
Em ê bi hev re aştiyê ava bikin’
Gulşen Ozerê da zanîn ku wan ji bo mitîngê li hemû navçeyan komîsyon avakirine û wiha domand : “Li tax û kolanan xebatên me didomin. Em dixwazin gel jî di nav xebatên me de cîh bigire. Em ê bi hev re bingeha aştiyê ava bikin. Şiyara me ‘Azadiya Abdullah Ocalan azadiya gelan e’ ye. Bi vê şîarê em ê xebatên xwe bimeşînin.”
Bi vê nêzikatiyê pêvajo nagihêje tu encamê
Rûçem Vefa Elyakûtê jî da zanîn ku Rêberê Gelê Kurd 26 sal in di bin tecrîdê de ye, lê tevî vê tecrîda giran xebatên ji bo aştî û civaka demokratîk berdewam kiriye û axaftina xwe wiha domand: “Em jî dizanin ku heta birêz Abdullah Ocalan azad nebe û tecrîd bidome, gelê Kurd jî azad nabe. Bi vê nêzikatiyê jî pêvajo nagihêje tu encamê. Em ê di 4ê Çileya 2026an de li qada Îstasyonê mitîngekê li dar bixin. Ev mitîng pir girîng e. Em ê dengê xwe ji bo azadiya Rêberê Gelê Kurd û azadiya gelê Kurd bilind bikin. Bi taybetî divê jin û ciwan û hemu gelê me dengê xwe bilind bike.”
‘Werin em bi hev re pişt bidin Rêberê Gelê Kurd’
Rûçem Vefa Elyakûtê diyar kir ku sed sal in gelê Kurd di bin desthilatiyê de ye û wiha got: “Rêberê Gelê Kurd jî vê yekê dizane. Ji ber vê yekê têkoşîneke bêhempa dimeşîne. Divê em piştgiriyê bidin Rêberê Gelê Kurd birêz Abdullah Ocalan. Birêz Ocalan dibêje ‘Heya civak azad nebe ez jî azad nabim.’ Em jî dibêjin heya Rêberê Gelê Kurd azad nebe civak jî azad nabe. Li tax, kolan û navçeyan me komisyonên xwe avakiriye û roj bi roj em xebatên xwe dimeşînin. Bi taybetî banga me ji dayik, jin û ciwanên me ew ke ku bi girseyî beşdarî mîtîngê bibin û azadiya Rêberê Gelê Kurd Abdullah Ocalan bixwazin.”
