Piştî têkçûna rejîma Beşar Esad yekem car li Başûrê Sûriyê li dijî Îsraîlê êrişên çekdarî pêk hatin û li dijî vê yekê hêzên leşkerî yên Îsraîlê navçeya Beît Jînn bombebaran kir û gelek kesan jiyana xwe ji dest da.
Gengaşiyên di navbera Îsraîl û Sûriyeyê de her ku diçe zêde dibe. Piştî têkçûna rejîma Beşar Esad yekem car di nav axa Sûriyê de li dijî hêzên Îsraîlê êrîşên çekdarî pêk hatin. Di encama êrişê de 13 leşkerên Hêzên Parastina Îsraîlê birîndar bûn. Li dijî van êrişan, Îsraîlê navçeya Beît Jînn bombebaran kir û di encama de gelek çekdarên Hikûmeta Demkî ya Suriyeyê û sivîlan jiyana xwe ji dest dan. Çavkaniyên leşkerî yên Îsraîlê derbarê mijarê de ji televîzyona Î24NEWS a Îsraîlê re axivîn. Rayedarek leşkerî yê Îsraîlî destnîşan kir ku di nav komên êriş kirin de kesên girêdayî Serokwezîrê Demkî yê Sûriyê Ehmed El Şara jî tespît kirin e.
‘Îsraîl ji Sûriyê dernakeve’
Çavkanî daxuyand ku wan telîmat ji îradeya siyasî girtine ku destûr nedin li nêzîk sînorên Îsraîlê baregehên leşkerî bên avakirin. Heman çavkanî derbarê danûstandinên di navbera Sûriyê û Îsraîlê de jî ev agahî dan: “Sûriye niha xwedî îstîkrarek ku bi Îsraîlê re peymanek çêbike de nîne. Pir bêîstîkrar e. Bûyerên dawî jî ev yek piştrast kir. Her wiha vê yekê nîşan da ku divê Îsraîl ji Çiyayê Hermon û deverên kontrol dike, dernekeve.”
‘Sozên Trump bandorê li siyaseta Îsraîlê nakin’
Li gorî heman çavkaniyê piştî serdana Şara ya Washingtonê û hevdîtina wî ya bi Serokê DYAyê Donalt Trump re helwesta wan guheriye û daxuyaniyên Şamê yên derbarê Îsraîlê de hişk bûne. Çavkaniyê leşkerî ku daxuyaniyên Şara û Wezîrê Karên Derve Şeybanî yên wekî, “Divê Îsraîl axa Sûriyeyê terk bike û bikişe sînorên berî 7ê Cotmeha 2025an” bi bîr xistin û ev daxuyanî wekî astengkirina peymanek nû di navbera herdu welatan de nîşan da. Di nûçeyê de hate destnîşankirin ku Trump hin soz dane Şara lê Îsraîlê bombebarankirina Beît Jinnê xwest bi Şara bide famkirin ku ev soz dê bandorê li siyaseta Îsraîlê neke. Di nûçeyê de çavkaniyek dîplomatîk jî diyar dike ku Îsraîl û Sûrî li gorî hefteyek berî niha ji peymanekê pir dûrtir in.
