Abdullah Înan ê piştî 32 salan di girtîgehê de hat ragirtin hat berdan û bi awayeke girseyî hat pêşwazîkirin.
Abdullah Înan ê bi îdiaya “endamtiya rêxistinê” 32 salan di girtîgehê de hatiye ragirtin hat berdan. Abdullah Înan ji hêla TUAY-DERa Êlihê, MEBYA-DER, TJA, Dayikên Aştîyê, partiyên siyasî, nûnerên saziyên sivîl û xizmên xwe ve bi awayeke girseyî hat pêşwazîkirin.
‘Divê em li her derê yekîtiya xwe xurt bikin’
Hevserokê TUAY-DERê Hasan Arigtekîn ku di piştî pêşwazîkirinê axivî û wiha got: “Çavên malbata me û hemû hevalên me ronî be, aqubet li serê Rêber Apo û hemû havalên me be. Hêviya me ew e ku hemû hevalên me yên di zindanan de tên ragirtin bên berdan. Em li hember keda hemû hevalên ku 30 sal in têkoşîneke bêhempa didin meşandin, bejna xwe ditewînin. Divê ku em tifaq û yekîtiya xwe bidin avakirin. Em dibînin ku îro çawa desthilatdar plan û projeyên xwe li ser Kurdistanê didin meşandin. Bi vî awayî divê em li her derê yekîtiya xwe xurt bikin.”
‘Em dest bidin hev em ê bi ser kevin’
Abdûllah Înan ê hatiye berdan jî axaftineke kurt kir û ev tişt goitn: “Heke ku em îro bêjin çandeke me heye, divê em xwedî li wê çandê derkevin. Ger ku em li vê çandê nebin xwedî, em ê li hember keç û xortên xwe bikevin kêmasiyê, ji ber ku wan bedel dane. Dema ku em xeyalên wan bi cih bînin em ê karibin bêjin me peywira xwe bi cih aniye. Serokatî jî her tim dibêje ji nû ve avakirin. Ger ku em hemû desten xwe bidin hev em ê bi ser bikevin.”
Derbarê Abdullah Înan de
Abdullah Înan di sala 1994an de li Sêrtê hatiye girtin, bi îdiaya “Endamtiya rêxistinê” li DGMê hatibû darizandin û bi cezayê muebetê hatibû cezakirin. Abdullah Înan piştî li Sêrtê hat girtin jî wir bi dorê surgunî Amed, Erzirom, Dîlok û herî dawî jî di li Girtîgeha Şakran a Alîaga hat ragirtin. Abdullah Înan ji Girtîgeha Alîaga hat berdan.
