Di demeke ku gefên DAIŞê û komên çeteyan li ser Êzidiyên Şengalê zêde bûye de Artêşa Iraqê li Şengalê dest bi komkirina çekên welatiyên Êzidî kir. Artêş bi vî awayî rê li ber qirkirineke nû ya Êzidiyan vedike.
Piştî gefên Wezîrê Karên Derve yê Tirk Hakan Fîdan ên dijî Êzidiyên Şengalê, artêşa Iraqê tevî ku li dijî daxuyaniyê derket jî li Şengalê dest bi bêçekkirina Şengaliyan û çêkirina noqteyên nû yên leşkerî kir.
Şengalî li dijî êrişên DAIŞ û metirsiya fermanê xwe biçek kirin. Li gel metirsiya fermanê û gefên Tirkiyeyê, Artêşa Iraqê li seranserê Şengalê dest bi komkirina çekên welatiyan kir. Her wiha çavkaniyên ewlekariya Şengalê jî piştrast kirin ku artêşa Iraqê li seranserê Şengalê dest bi operasyona komkirina çekan kiriye.
Êzidî xwe bi çekên di destên xwe de diparêzin. Li gor agahiyên ji heremê hatine girtin Artêşa Iraqê dest bi komkirina çekên di destên welatiyan de ne kir. Tê payîn ku dê ev operasyon dê li Şengalê were berfirehkirin.
Divê were bîrxistin ku di sala 2014an de jî hêzên fermê yên Şengalê beriya ferman dest pê bike dest danîn ser çekên Êzidiyan û paştre çete êrişê Êzidiyan kirin. Gel diyar dike ku hewldana Artêşa Iraqê ya niha fermana 2014an bibîr dixe.
