Li Kreş û Mala Lênihêrtinê ya Xalxalok û Perperikê bi boneya girêdana çandî û pêşxistina jêhatîbûna destan a zarokan xebata “Sêve Mêxekrêj” hat lidarxistin.
Li Kreş û Mala Lênihêrtinê ya Xalxalok û Perperikê ya girêdayî Gerînendetiya Karên Çandî û Civakî ya Şaredariya Peyasê, perwerdehiya pirzimanî didome. Di heman demê de, xebatên ji bo parastin û gihandina mîrateya çandî ya Kurdî jî pê re girêdayî berdewam dikin. Di çarçoveya xebatên çandî de li her du kreşan xebata “Sêva Mêxekrêj” a remza evîn, dilsozî û aştiyê, hat kirin û ev çand ji zarokan re hat parvekirin.
Girêdana çandî pêş dixe
Di çalakiyê de, zarokên kreşê di bin rêberiya mamosteyên xwe de bi malbatên xwe re sêvan bi qûrnefîlan xemilandin. Kevneşopiya bi sedan sal in di çanda Kurdî de wek diyariyeke evîndariyê tê naskirin, bi awayekî xweş hate pêkanîn. Zarok bi destên xwe sêvên sor bi qûrnefîlan xemilandin. Xebat armanc dike ku zarok di mijarên jêhatîbûnên destan, nirxên çandî ve girêdan, hevgirtin, dilovanî û aştiyê de pêş bikevin.
Kevneşopî tê zindîkirin
Berpirsiyarên zarokistanê diyar kirin ku çalakiyên bi vî rengî ji bo xurtkirina hestên girêdayîbûn û nasnameya çandî pir girîng in û wiha gotin: “Armanca me ne tenê perwerdehiyeke baş e, di heman demê de em dixwazin zarokên xwe bi nirx û kevneşopiyên çandî yên xwe re rûbirû bikin û wan zindî bihêlin. Sêva Mêxekrêj yek ji wan sembolan e ku bi awayekî herî xweş evîn û aştiyê îfade dike û di erdnîgariya me de cihê xwe yê taybet digire.”
Bêhna evîn û aştiyê belav bû’’
Ev çalakî ne tenê kêliyeke perwerdeyî bû, lê di heman demê de gaveke girîng bû ji bo veguhestina mîrateya çandî ji nifşekî ber bi nifşekî din ve bê vegûhestin. Zarok bi kêfxweşî beşdarî çalakiyê bûn û bi saya vê kevneşopiyê, bêhna evîn û aştiyê li zarokistanê belav bû.”
