Li Cizîrê 117 welatiyên 10 sal berê di dema qedexeya derketina derve de li “Jêrzemînên Wehşetê” hatibûn kuştin, hatin bibîranîn. Di bîranînê de soza domandina têkoşîna wan hate dayîn.
Di 14ê Kanûna sala 2016an de li navçeya Cizîrê ya Şirnexê qedexeya derketina derve hate ragihandin. Qedexe 79 rojan berdewam kir. Di dema qedexeyê de 177 jê di jêrzemînan de bi giştî 288 kes hatin kuştin. Di jêrzemînan de ku weke “Jêrzemînên Wehşetê” tên binavkirin de 177 kes hatibûn şewitandin û kuştin. Bi boneya salvegera kesên di jêrzemînan de hatin kuştin, li Taxa Nûrê ya Cizîrê merasîma bîranînê hat lidarxistin. Li gel malbatên xizmên wan hatine kuştin, nûnerên partiyên siyasî û rêxistinên civaka sivîl jî tev li bîranînê bûn. Bîranîn, bi deqeyek rêzgirtinê dest pê kir.
Piştre jî Rêvebera MEBYA-DERê Esmer Çikmaz ku di komkujiyê de keça wê Yasemîn Çikmaz û kurê wê Vahap Çikmaz hatibûn kuştina axivî. Esmer Çikmaz got: “Em qetlîamê şermezar dikin. Heman qetlîama 10 sal berê li Cizîrê hatibû kirin, îro li Rojava tê kirin. Em van qetlîaman tevan şermezar dikin. Em ê wan ji bîr nekin.”
Hevseroka DBPa Cizîrê Aynûr Elçîoglû jî got ku dê kesên hatine kuştin ji bîr nekin.
Hevserokê DEM Partiyê yê Şirnexê Ramazan Uysal jî anî ziman ku dê wehşeta hatiye kirin ji bîr nekin û têkoşîna xwe bidomînin.
‘Em ê komkujiyê ji bîr nekin’
Parlamentera DEM Partiyê Newroz Uysal Aslan jî diyar kir ku dewletê 10 sal berê bi qetlîamê bersiv da daxwaza gel a xwerêvebirinê û got: “Em ê her tim ji bo kesên di jêrzemînan de hatine kuştin daxwaza edaletê bikin. Em ê ji kujeran hesabê bipirsin. Gelê Kurd dê vê qetlîamê ji bîr neke.
Esmer Tunç a ku di qetlîamê de kurên wê Orhan û Mehmet Tunç hatibûn kuştin jî got ku dê kesên di qetlîamê de hatin kuştin ji bîr nekin û xwedî li têkoşîna wan derkevin.
Di bîranînê de ji bo kesên hatin kuştin mewlûd hate xwendin. Ji bo xêra wan xwarin hate dayîn û dua hatin kirin.
