Wan – Hevserokê DBPê yê Wanê Cemal Demîr têkildarî hevpeymana ku di navbera Rêveberiya Xweser û Hikumeta Demkî ya Şamê de hatiye îmzekirin axivî û got: “Êrişên çeteyan ruhê yektiyê derxist holê. Heta kongreya neteweyî neyê avakirin dê Kurd her di bin xeteriyê de bin.”
Piştî êrişên çeteyên HTŞê yên ji 6ê Çileyê ve di encama berxwedana gelê Kurd de di navbera Hikumeta Demkî ya Şamê û Rêveberiya Xweser de peymanek hat îmzekirin. Ruhê yekitiyê yê gelê Kurd ê derketiye holê li çeteyan paş de gav da avêtin. Di derheqê hevpeyman û berxwedana gelê Kurd de Hevserokê Partiya Herêmên Demokratîk (DBP) yê Wanê Cemal Demîr ji Ajansa Welat (AW) re axivî.
‘Divê hevpeyman di destûra bingehîn de were misogerkirin’
Cemal Demîr bal kişand ser naveroka hevpeymanê û diyar kir ku her çiqas di hevpeymanê li ser destûra bingehîn statuyek şênber li gor vê peymanê nehatibe diyarkirin jî girîng e û got: “Ji bo Rêveberiya Xweser ya Bakur û Rojhilatê Sûriyeyê hebûna HSDê girîng e, parastina statuya hêza cewherî xaleke girîng e. Dîsa Rêveberiya Xweser hebûna xwe, pergala xwe ya perwerdehî û rêveberiyê di vê peymanê de diparêze. Lê divê ev hevpeyman di destûra bingehîn de were misogerkirin. Ji ber ku em dizanên tu girêdana van hêzan bi nirxên exlaqî û mirovî re nîn e. Piştî ku ji aliyê îdarî, siyasî û leşkerî de entegrasyon pêk hat divê xalên vê hevpeymanê bibin xalên destûra bingehîn.”
‘Divê berxwedan dewam bike’
Cemal Demîr da zanîn ku ji bo statuya gelê Kurd li Rojava misoger bibe, ev hevpeyman di destûra bingehîn ya dewleta Sûriyeyê de bi cîh bibe divê berxwedana gelê Kurd berdewam bike û wiha pê de çû: “Ji xwe ev hevpeyman jî di encama berxwedana gelê Kurd û dostên wî de, di encama xebatên dîplomasiyê de derket holê. Dibe ku ev hevpeyman di hin xalan de li gor daxwazên gelê Kurd nebe lê ev pêvajoyeke, dê bi berxwedana gelê Kurd, bi berxwedan Rêveberiya Xweser statuya gelê Kurd zêdetir şênber bibe.”
‘Xetere dê bi Kongreya Neteweyî bidawî bibin’
Cemal Demîr îşaret bi ruhê neteweyî û yekitiya gelê Kurd jî kir û axaftina xwe hiwa berdewam kir: “Van êrişên çeteyên HTŞ û DAIŞê yekitiya gelê Kurd derxist holê. Ji bo ku Ev yekitî îro şûn ve destketiyên gelê Kurd biparêze jî divê Kongreya Neteweyî pêk bê. Heta ku Kongreya Neteweyî pêk neyê gelê kurd dê di her awayî di bin xetereyê de be. Ji ber wê jî divê demildest Kongreya Neteweyî bê li darxistin. Me di van êrijan de jî dît armanc ne tenê Rojava ye, arman ji holêrakirina gelê Kurd e.”
