Stenbol – Hevberdevkê HDKê Alî Kenaoglû têkildarî peymana di navbera HSD û Hikûmeta demkî ya Şamê de hate îmzekirin diyar kir ku ji bo talûkeya li Sûriyeyê bi dawî bibe divê destûrek demokratîk were derxistin û got: “Heta ku aştiyeke mayînde pêk were em ê têkoşîna xwe berdewam bikin. Divê bi vê peymanê êriş û dorpeçên li ser Rojava bi dawî bibe. Divê ku destkeftiyên gelê Kurd tune neyê hesibandin.”
Di navbera Hêzên Sûriyeya Demokratîk û Hikûmeta demkî ya Şamê de peymaneke hat îmzakirin. Di peymanê de HSD hebûna xwe ya leşkerî diparêze û destkeftiyên gelê Kurd ên li Rojava dê bên parastin. Hevberdevkê Kongreya Demokratîk a Gelan (HDK) Alî Kenanoglû têkildarî peymanê ji Ajansa Welat re axivî.
‘Nexwestin li Rojhilata Navîn li dijî wan sîstemek were avakirin’
Alî Kenanoglû diyar kir ku hêzên Navneteweyî li Rojhilata Navîn û Sûriyê xwestin sistemekê ji bo ewlekariya ÎsraÎlê ava bikin lê bi sedema ve armancê tevahiya Rojhilata Navîn bû gola xwîne û got: “Agirê ku Xezezyê hatibû pêxistin belavî tevahiya welatên Rojhilata Navîn bû. Ev plana ji bo ewlekariya Îsralê bû lê bandorê li gelek welatên din kir. Deshilata Esed jî bû armanca vê planê. Îro jî armanc Îran e. Planên emperyalîstan heye lê heke welatek jî di nava xwe de demokrasiyê ava neke, hêzên emperyalîst jî vê ji bo berjewendiya xwe bikar tînin. Li Rojhilata Navîn nexwestin li dijî wan sîstemek were avakirin. Ji ber vê yekê bi destê HTŞê êrişî Bakur û Rojhilatê Sûriyeyê kirin.”
‘Li dijî hemû êriş û gefan bersiv hat dayîn’
Kenanoglû anî ziman ku Sûriyeyekê demokratîk û xweser ji bo tevahî gelên herêmê bûye mînak û wiha axivî: “Welatên yekperest ji bo sîstema Rojava ji holê rakin ketin nava tevgerê. Bi alikariya hêzên navneteweyî dewleta Tirkiyeyê di êrişên li ser Rojava de peywîr girt. Li dijî hemû êriş û gefan bersiv hat dayîn. Sîstema ku azadiya jinan û jiyana demokratîk diparast li dijî êrişan xwe parast. Êrişên li ser Rojava li Sûriye, Tirkiye û Ewropa bi berxwedaneke mezin re rû bi rû ma.”
‘Divê gelên li Sûriyeyê pêşeroja xwe diyar bikin’
Kenanoglû destnîşan kir ku ew wekî HDKê peymana di navbera HSDê û hikûmeta demkî de hatiye îmzekirin erênî dibînin û wiha domand: “Me di serî de jî got, divê gelên Sûriyeyê xwe bi xwe pêşeroja xwe diyar bikin. Daxwaza me ew e ku bi vê peymanê re êriş û dorpêçên li ser Rojava bi dawî bibe. Pêwîst e qetlîamên li dijî gelê Kurd, Elewî û Dûrziyan bi dawî bibe. Divê ku destkeftiyên gelê Kurd tune neyê hesibandin. Me dit ku destkeftî bi berxwedanê hatiye bidestxistin û parastina wê jî ne hêsan e.”
‘Divê destûrek demokratîk were amadekirin’
Kenanoglû di dawiya axaftina xwe de anî ziman ku ew wekî HDKê dibêjin ji bo demokratîkbûyîna Sûriyeyê divê gav bên avêtin û got: “Ji bo qetlîam, zext û talûkeyên li Sûriyeyê bi dawî bibin, divê destûrek bingehîn a demokratîk were amadekirin. Hemû maf, çand, bawerî û netew bên parastin. Paşê jî bi hilbijartinê rêveberiya Sûriyeyê bê diyarkirin. Ji bo ev yek pêk were pêwîstî bi alikariya tevahiya gelên Sûriyeyê heye. Heta ku aştiyeke mayînde pêk were em ê têkoşîna xwe berdewam bikin.”
