Riha – Endamê Konseya Hevseroktiya PYDê Salih Muslîm têkildarî agirbesta di navbera HSD û hikûmeta demkî ya Şamê de pêkhatiye anî ziman ku bi hevpeymana agirbestê re taybetmendiya herêmên Kurdan dê weke xwe bimîne û wiha got: “Hevpeymana pêkhatiye komploya li dijî Kurdan vala derxist.”
Endamê Konseya Hevserokatiya Partiya Yekîtiya Demokratîk (PYD) Salih Muslim têkildarî agirbesta di navbera Hezên Sûriyeya Demokratîk (HSD) û hikumeta demkî ya Şamê de pêkhat ji Ajansa Welat (AW) re axivî.
‘Peymanê komplo vala derxist’
Salih Muslim diyar kir ku hevpeymana pêkhatiye komploya li dijî Kurdan vala derxistiye û wiha got: “Ji ber wê jî ev peyman girîng e. Taybetmendiya herêmên Kurdan hat parastin. Welatiyên koçberbûne dê vegerin cih û warên xwe. Mesela perwerdehiyê jî weke xwe bimîne yanî ji dibistana seretayî heta zanîngehê dê bi zimanê Kurdî be. Herêmên me jî wê ji aliyê me ve bên parastin. Asayîş dê bi giştî ji me bin. Ew xalên hevpeymanê ne. Hin xal jî dê demên pêş ve werin nîqaşkirin. YPJ jî weke tugayeke jinan dê herêmên me biparêze. Pergala hevserokatiyê û taybetmendiyên me dê weke xwe bimîne.”
‘Amerîka û Fransa navbenkarî kir’
Salih Muslim bi lêv kir ku taybetmendiya vê agirbestê ew e ku hezên weke Amerîka û Fransa jî navbenkarî kirin û wiha dirêjî da axaftina xwe: “Ji berê ve agirbest pêkhatin lê êriş jî berdewam kir. Em dikarin xwe biparêzin. Çend caran xwestin êriş bikin lê nekarîn. Heke êriş bikin jî dê li ser parastina me bimîne. Dema ji berê agirbest dibû hezên garantor tune bûn. Lê niha Amerîka û Fransa jî garantor in. Em hevî dikin ev bimeşe. Heke nemeşe ji şer re jî amade ne. Şer bixwazin em ê xwe biparêzin.”
‘Yekitiya gelê Kurd derket holê’
Salih Muslim destnîşan kir ku çalakiyên çar aliyên Kurdistanê û derveyî welat pêkhatine bandor li ser hevpeymanê kirin û wiha pê dê çû: “Ew dewletên garantor jî ji ber sekna gelê Kurd navbenkarî kirin. Dîtin ku gelê Kurd çiqas hevgirtî ye. Em hevî dikin gelê me heta hevpeyman bikeve meriyetê li welat û derveyî welat dev ji çalakiyan bernedin. Yekitiya gelê Kurd jî derket holê. Yekitiya gelê Kurd li ser xwîna şehîdan derket. Em vê jî ji bîr nakin. Em hevî dikin yekitiya xwe jî ava bikin.”
