Komîsyona Navendî ya Jinan a ÎHDê bi boneya sûcê şer ên li dijî jinan û êrişên ser Rojava li Amedê daxuyanî da û paşê name ji saziyên navneteweyî re hatin şandin û ev peyam hat dayîn: “Divê li dijî sûcê şer saziyên nawneteweyî piştgiriyê bidin Rojava.”
Komîsyona Jinan a Komeleya Mafên Mirovan (ÎHD) a Şaxa Amedê li dijî sûcê şer ên ku li Rojava li dijî jinan tên kirin li avahiya daxuyanî da çapemeniyê. Rêveberên ÎHDê, nûnerên saziyên sivîl beşdarî daxuyaniyê bûn. Komîsyonê xwest ku li Kobanê “Korîdora Jiyanê” were vekirin. Daxuyaniya bi zaravayê Kurmancî rêvebera ÎHDa Amedê Eylem Kaya û metna bi Tirkî jî rêvebera ÎHDa Amedê Sûzan Mehmetoglu xwendin.
‘Sûcê şer dubare dibin’
Eylem Kaya destnîşan kir ku êrişên sîstematîk ên ku ji hêla komên çekdar ên girêdayî HTŞê ve ku bi piştgiriya eşkere an veşartî ya hêzên cîhanî li Sûriyeyê tên kirin. Eylem Kaya anî ziman ku êriş li dijî Elewî, Durzî, Kurd, Ermenî û gelên din ên li herêmê dijîn tên kirin û ev êdî ji aliyê raya giştî ya cîhanê ve tê zanîn. Eylem Kaya got: “Ev êriş sûcê şer e ku encamên wan giran û bêveger in, bi taybetî ji bo jin û zarokan. Hedefgirtina jin û zarokan binpêkirinên eşkere yên mafên mirovî ya navneteweyî ye. Li ber çavên cîhanê laşê bêcan ê jinekê ji avahiyekê de hate avêtin. Ev kiryar, asta hovîtiya li dijî jinan dide nîşandan. Ev sûc ne bûyerên yekcarî ne; ew beşek ji polîtîkayeke tundiyê yên sîstematîk e.”
‘Jin û zarokên li herêmê di bin gefên cidî de ne’
Eylem Kaya destnîşan kir ku îro, li Rojava, bi taybetî li bajarên Heseke û Kobaniyê yên ku piraniya niştecihên wan Kurd in, jin û zarokên li herêmê di bin gefek cidî de ne û got ku mafên jiyanê yê jinan tê binpêkirin û rûmet û azadiya wan rasterast tê hedefgirtin. Eylem Kaya anî ziman ku li Sûriyeyê û bi taybetî li Rojava, komên çekdar ên girêdayî HTŞê sûcê şer ên sîstematîk li dijî jinên Kurd, Elewî, Ermenî, Durzî û yên din dikin û got ku bêdengiya saziyên navneteweyî ya di vê derbarê de nayê qebûlkirin.
‘Bêdeng nemînin’
Eylem Kaya diyar kir ku wekî parêzvanên mafên mirovan ên jin careke din, hewceyî pê dibînin ku van tiştan bi bîr bîxin: “Saziya Neteweyên Yekbûyî bi armanca pêşîgirtina şeran û parastina sivîlan hatiye damezrandin, û mekanîzmayên wê yên taybet hene ku bi tundûtûjiya li dijî jinan re eleqedar e. Girîng e ku ev mekanîzma li dijî sûcê şer ên li dijî jinên li Sûriye û Rojava derkevin. Divê hemû nûnerên ku di saziyên Yekîtiya Ewropayê de kar dikin, bi taybetî endamên jin ên parlamentoyê, li dijî van sûcên giran ên li dijî jinan tên kirin, bêdeng nemînin.”
‘Divê bi berpirsiyarî rabin’
Eylem Kaya da zanîn ku ew bang li jinên ku di Neteweyên Yekbûyî û Yekîtiya Ewropayê de dixebitin dikin ku li dijî sûcê şer ên li Sûriyeyê û Rojava tên kirin rabin û bi taybetî li hemberî tundiya li ser jin û zarokan bêdeng nemînin û bi berpirsiyarî rabin.
Piştî daxuyaniyê Komîsyona Jinan derbasî postexaneyê li navçeya Sûr a Amedê bû û ji saziyên navneteweyî re name şandin û di nameyan de hat xwestin saziyên navneteweyî li dijî sûcê şer rabe û piştgiriya jinan bikin.
