Dorpêça çeteyên HTŞê û DAIŞê yên girêdayî Tirkiyê li ser Kabonê berdewam dike. Rayedarên Kobanê û niştecihên bajar diyar kirin ku kêmbûna pêwistiyên jiyanî hatiye astek xetere û banga piştevaniyê kirin. Ji çar perçeyên Kurdistanê, sazî û dezgehên biyanî jî banga rakirina dorpêça li ser bajar dikin.
Li Kobanê dorpêça çeteyên HTŞê û DAIŞê ên girêdayî Tirkiyeyê hindî diçe zêde dibe. Rayedarên Kantona Kobanê û niştecihên gund bi dîmen û peyamên didin raya giştî de balê dikişînin ser xeteriya dorpêçê. Dermansaz Aram Elî hişyarî da ku ji ber dorpêça giran derman li Kobanê pir kêm bûye û hejmara birîndaran pir e. Aram Elî banga lezgîn kir. Aram Elî yê ku li Kobanê dermansaze, diyar kir ku ji ber dorpêçê dabînkirina dermanan zehmete û banga alîkariya lezgîn kir. Li Kobanê ji ber dorpêça li bajêr pirsgirêka dabînkirina derman heye. Aram Elî yê ku li Kobanê dermansaze û ji Ajansa Nûçeyan a Hawarê re axivî, diyar kir ku nexweşxaneyên ku berê xizmetguzariya tenduristiyê ji bo 800 kesan dida niha tenê dikare li rewşên lezgîn binêre.
‘Gelek derman tunin’
Elî diyar kir ku Kobanê ji çar aliyan ve hatiye dorpêçkirin û ji ber dorpêçê di serî de dermanên zarokan derman nayê dabînkirin. Elî rave kir ku dermanên tansiyon, penceşêr û diyanetê kêm bûne û beşa diyalîzê bi tevahî hatiye rawestandin. Aram Elî, anî ziman ku ji ber dorpêçê destur nayê dayîn ji bo derbaskirina kelûpelên bingehîn û dermanan. Elî destnîşan kir ku ger rewşa wiha bidome dê krîzekî mirovî ya mezin li Kobanê rû bide û ev tişt got: “Şer didome. Hejmara birîndaran pir in û derfetê emeliyatê nîn e. Dermanên me pir hindik in. Hinek birîndar ji ber nebûna dermanan şehîd dibin.” Elî, di dawiya axaftina xwe de ji bo rakirina dorpêçê bang kir.
SOHR: Li Kobanê kirîz mirovî girantir bûye
Çavdêriya Sûriyeyê ya Mafên Mirovan (SOHR) hişyarî da ku li Kobanî ji ber dorpêça dijwar a çeteyên Hikûmeta Demkî ya Sûriyê û şert û mercên dijwar ên zivistanê kirîz mirovî girantir bûye û daxwaza mudaxeleya mirovî ya lezgîn kir. SOHRê hişyarî da ku bajarê Kobanî di bin dorpêça dijwar a çeteyên Hikûmeta Demkî ya Sûriyeyê û şert û mercên dijwar ên zivistanê ber bi rewşeke mirovî ya xerab v diçe û bang li rêxistinên mirovî yên navneteweyî kir ku “tavilê mudaxele bikin û bi hezaran sivîlên dorpêçkirî rizgar bikin.” SOHRê diyar kir ku Kobanî “zêdetirî hefteyekê ye bi tevahî hatiye dorpêçkirin”, ev yek bûye sedema rawestandina derbasbûna xwarin û pêdiviyên bingehîn.
Hebûna bi deh hezaran koçberî rewşê girantir dike
SOHRê da zanîn gelek koçberên ji Reqa, Tebqa û Eyn Îsayê û bi deh hezaran kesên ji gundên derdorê çûne Kobanê, û gelek ji wan neçar in ku li dibistanan, avahiyên giştî an jî li kolanan razên, “di şert û mercên zivistanê yên dijwar û barîna berfê de”. Der barê rewşa tenduristî de SOHRê ragihand ku “oksîjen li yek ji nexweşxaneyên bajêr xilas bûye”, ku bûye sedema mirina 5 zarok û zilamekî. Her wiha derman û şîrê zarokan jî kêm bûye. Li ser heman mijarê, Ofîsa Neteweyên Yekbûyî ya ji bo Karûbarên Mirovî (OCHA) duh der barê “kirîza mirovî li bajarê Kobanî û gundewarê wê”, hişyarî da û bal kişand ser “girtina hemû rêyên ku diçin bajêr û kêmbûna pêdiviyên bingehîn”.
