Stenbol – Mele Mehmet Emîn Aslan û Hevberdevkê Komîsyona Gelan û Baweriyan ya DEM Partiyê Yavuz Kahraman diyar kirin ku bawermend birayê hevdu ne, mafên ku ji bo tevahî cîhanê hene divê ji bo gelê Kurd jî hebin û gotin: “Îro li Rojhilata Navîn li dijî Kurdan dorpeçek hebe li wir Îslam tune ye. Xweda dadê ji her kesî re ferman dike.”
Hêrs û aciziya gelê Kurd a li dijî êrişên qirkirinê yên li ser Rojava berdewam dike. Ji her beşên civakê li dijî êrişên çeteyan radibin. Endamê Komela Alîkarî û Piştgiriya Alimên Olî yên Stenbolê Mehmet Emîn Aslan û Hevberdevkê Komîsyona Ol û Baweriyê ya DEM Partiyê Yavuz Kahraman ji Ajansa Welat re axivîn û nerazîbû nîşanî êrişên li ser Rojava dan.
‘Cihê wan di îslamê de tune ye’
Mehmet Emîn Aslan diyar kir ku tevahiya olan ji bo parastina mirovan hatine û wiha got: “Ol jiyan û aştî ye. Di olê de kuştin û talan tune ye. Îro li Rojhilata Navîn li dijî Kurdan dorpeçek hebe li wir îslam tune ye. Xweda dadê ji her kesî re ferman dike. Kesên ku dixwazin zimanê xwe biparêzin û dixwazin azad bijîn, li ser wan bi navê îslamê êriş heye. Ew mirov bi navê xweda û bi gotina ‘Elahûekber’ serê mirovan jê dikin. Cihê wan di îslamê de tune ye. Oldar divê dijminatiya mirovan neke, ol ji bo tevahî mirovan hatiye dinê. Yên ku dibêjin ez misilman im divê bibêjin, bawermend birayê hevdu ne, mafên ku ji bo tevahî cîhanê hene divê ji bo gelê Kurd jî hebin.”
‘Bila kesekî bi navê îslamê kesekî nekujê’
Mehmet Emîn Aslan anî ziman ku di ola îslamê de şertê yekemîn mafê jiyanê ye û ev yek anî ziman: “Şertê duyemîn jî mafê ziman e. Kesên ku bi navê îslamê gel dorpeç kirine em ji wan xwe sual dikin. Di çêkirina erd û ezman de cudahiya xweda heye. Em dibêjin eqlê xwe bi kar bînin. Xweda bi şandina ayetan wan mafan daye gelê Kurd. Ji bona wê qedexekirina zimanê Kurdî çi ye? Heke ku em naveroka Kuranê binerin kirina wan ji derveyî îslamê ye. Bila kesekî bi navê îslamê kesekî nekujê.”
‘Jiyan mafê tevahî mirovan e’
Yavuz Kahraman jî destnîşan kir ku şerê ku li ser Kurdan tê meşandin şermezar dike û got: “Ji avakirina cîhanê ji vir ve çiqas pirtûkên olî hatibin dibêjin mirovan nekujin. Tevahî mirov yek in. Kuştina mirovan di îslamê de tune ye. Ji dema Kerbelayê vir ve ol ketiye di destê desthilatdaran de. Ol yek e lê herderê cîhanê ol cuda ye. Îro jî olê îslamê li Rojhilata Navîn cudatir e. Gelek ji gelekî re zilm bike ev ne misiliman in. Rêberê gelê Kurd Abdullah Ocalan dibêje bi Peymana Medîneyê em pirsgirêkên xwe çareser bikin. Jiyan mafê tevahî mirovan e. Lê zarokên Kurdan dikujin û dibêjin ‘Elahûekber’. Îro li dijî me DAIŞ û HTŞ heye.”
‘Gelê Kurd jî axa xwe diparêze’
Yavuz Kahraman diyar kir ku dema ji Pêxember Muhammed re wehî hat ji Medenî çû şer nekir û axaftina wiha domand: “Kesên ne misilman gotin em ê herin Mekkeyê jî û misilmanan bikujin. Dema ev tişt hat gotin ji misilmanan re şer ferz bû. Îro gelê Kurd jî axa xwe diparêze. Zalim nabin şehîd, yên ku parastina axa xwe dikin dibin şehîd.”
