Li Rojavayê Kurdistanê di çarçoveya seferberiya neteweyî de amadekariyên berxwedanê û parastinê berdewam dikin.
Gelê Kurd li çar perçeyên Kurdistanê û li cîhanê xwedî li banga seferberiya neteweyî derket. Ligel mezinbûna berxwedana çar perçeyên Kurdistanê, li Rojava jî gel çek li mil bi hêzên ewlehiyê de hem amadekariyên parastinê dike û hem jiyana rojane rêxistin dike. Di roja şeşemîn de ji rojek ji rojên Rojave bi honandina berxwedanê berdewam dike.
Gel ji bo parastina Hesekê tevger bû
Bi sedan şêniyên bajarên Amûdê, Dirbêsiyê û Qamişlo bi armanca tevlîbûna berxwedana gelê Hesekê, bi konvoyek wesayitan derketin rê. Bi sedan şêniyên serê sibê bi sloganên, “Bijî Kurdistan” derketin piştî rêwitiyek bi seatan gihîştin Hesekê. Karwanê gel, li Çerxerêya Kevokê ya Taxa Til Hece, ji aliyê sedan şêniyên Hesekê ve hat pêşwazîkirin. Di pêşwazîkirinê de diruşmeyên, “Bijî berxwedana Rojava”, “Bijî berxwedana Kobanê”, “Bijî berxwedana Hesekê” hatin berzkirin. Girse piştre tevlî komên li bajar nobedariya parastinê dikin, bû.
Xwediyên keziyan gel silav kirin
Şervan YPJê Jinda Çiyager ku li bajarê Hesekê ji bo parastina Rojava bi hevalên xwe re di çeperên şer de ye, di dema peşwaziya gel de peyamek da. Jinda ji ber piştevaniyê spasî kir û wiha got: “Em hêza xwe ya berxwedanê ji we digirin, bila her kes berê xwe bide Rojava.”
Şervan li sengeran bersiv didin
Li hemberî êrişan parastina şervanên HSDê li eniyên şer berdewam dike. Çeteyên HTŞ û DAIŞê di seatên sibê de bi 2 ronan êrişî gundê Sefaya ya girêdayî bajarê Çilaxa yê kantona Cizîrê kir. Dronên çeteyan ji aliyê şervanên HSDê ve hatin îmhakirin.
‘Her keziyek nîşaneyek azadiyê ye’
Endamên Kongra Star a Tirbespiyê têkildarî êrişên çeteyan ên li hemberî şervanên jin. Di daxuyaniyê de hate bi bîrxistin ku li Şengalê hetanî Rojava li dijî şervanên jin ên azadiyê bêhurmetî tê kirin û wiha hate gotin: “Lê divê baş bê zanîn ku keziyên me nîşaneya serkeftinê ne, em ê bi keziyên xwe dawiya çeteyan bînin.” Di dawiya daxuyaniyê de jinan dan zanîn heke wan keziyek jêkirî be, li şûna wê bi hezaran kezî hatine honandin.
Hêzên ewlehiyê gel silav kir
Şervanên HSDê yên li eniyên berxwedanê çalakî û xwepêşandanên çar parçeyên Kurdistanê silav kirin. Şervanên li eniya gundê Til Barût peyamek şandin û ev bang li gel kirin: “Berxwedana we hêz dide me, em gelê xwe yê Başûr, Bakûr, Rojhilat û Ewropayê silav dikin. Em pişta xwe didin gelê xwe, me biryara serkeftinê daye.” Şervanan daxuyand ku berxwedana gel hêz dide wan û bi gotina, “Li eniyên şer ne zivistan, ne serma ji bo me nabe astengî, maneviyata gelê me têrî me dike” dan gel.
Gel çek bi dest çav li senger e
Yekitî û rêxistinên girêdayî TEV-DEMê jî endamên xwe li bendên parastinê belav kirin û tev li xebatên parastina bajaran bûn. Li bajarê Qamişlo yekitî û rêxistinên girêdayî TEV-DEMê endamên xwe li bendên parastinê belav kirin û tev li xebatên parastina taxan bûn. Bi hezaran welatiyên çek û rext hildan bi hêzên ewlehiyê re mil bi mil li sengeran nobetê digirin û amadekariyên berxwedanê dikin.
Ji Rêveberiya Xweser xizmeta koçberan
Bi hezaran malbatên koçber ji bajarên Tebqa Reqa û Şedadê ku ji ber êrişên çeteyan reviyane, gihaştine Qamişloyê. Rêveberiya Xweser jî ji bo peydakirina pêdiviyên koçberan hemû saziyên xwe seferber kirin. Rêveberiya Xweser ragihand ji dema ku çete ketine deverên Reqa, Tebqa û Şedadê, zêdetirî 5 hezar malbat ji wan deveran koçberî Qamişloyê bûne.
Rêveberiya Xweser a kantona Cizîrê hemû saziyên xwe seferber kirine da ku koçberan bi cih bike û pêdiviyên wan ên bingehîn peyda bike. Ji bo pêwazîkirina koçberan komîteyên taybet amade kirin. Komîteya têkildarî kar û barên koçberan diyar kir ku derfetên wan têra hejmara zêde ya koçberan nake û da zanîn ku pêdivî bi piştgiriya lezgîn heye û banga alîkariyê kir.
