Êdî kezî tenê nayên hûnandin, her wiha kezî dibe navê taybet ên zarokan. Malbatek ji Helebceyê navê “Kezî” li pitika xwe kir.
Çeteyekî HTŞê bi navê Ramî El Dehş li bajarê Reqayê di 17ê Çile de şervaneke YPJê dikuje û piştre keziya wê yê hûnandî jê dike. Dîmenê vê hovîtiya xwe jî parve kiribû. Li ser torên medya dîjîtal li dijî vê yekê bertekên tund çêbûn û li seranserî cîhanê kampanyayek hûnandina keziyan hate destpêkirin.
Du roj bi sed hezaran jin tev li vê kampanyayê bûn û keziyên xwe hûnandin. Kezî êdî tenê nayên hûnandin, di heman demê de bû nav û nîşan li zarokên nû tên dinê.
Kezî bû nav û remza Kurdistanî
Li gorî agahî û wêneyê li ser medya dîjîtal hate belavkirin, li bajarê Helebceyê yê başûrê Kurdistanê malbatek ku pitika wan çêbû navê “Kezî” li keça xwe kir. Malbatê xwest bi vê helwestê êdî navê “Kezî” neyê jibîrkirin û bibe remz û nîşanek.
