Baroya Wanê, DADSAZ , şaxên ÎHDê, OHD û TÎHVê yên Wanê li dijî êrişên ser Rojava li pêşiya Edliyeya Wanê daxuyanî dan û diyar kirin ku ji holê rakirina Statûya Rojava zirarê dide aştiya herêmî jî.
Li dijî êrişên ser Rojava yên çeteyên girêdayî HTŞê, SMO û Tirkiyeyê Baroya Wanê, DADSAZ , şaxên ÎHD, OHD û TÎHVê yên li Wanê li pêşiya Edliyeya Wanê daxuyanî da. Daxuyaniyê sekreterê giştî yê baroya Wanê Alî Şapkacî xwend. Di daxuyaniye de pankarta “Li Rojava Qirkirin, Li Cihanê Bêedengî” hat vekirin.
‘Têkoşîna jiyan û ewlehiya herêmê’
Alî Şapkaci destnîşan kir ku Ji sala 2011ê ji vir ve domkirina şerê navxweyî yê li Surîyeyê bû sedema binpêkirina mafê jîyanê yên milyonan kesan û wiha got: “Lewma gelê Kurd ê li Rojava dijî, têkoşîna xwe ya li dijî DAIŞê û çeteyên mîna wê dide ji bo mafê jiyanê û ewlehiya herêmê ye. Pergala rêveberîya civakî û siyasî ya ku li Rojava derketiye holê, li ser bingeha rêveberiyeke demokratîk, piralî û bi beşdariya li ser esasê wekheviya ziman, dîn, bawerî û nasnameyê hatiye avakirin. Pergala Rêvebiriya ku li Rojavayê saz bûye, di civaka navneteweyî de bersiveke rewa dît. Ev yek wek tecrûbeyeke girîng hat nirxandin ku li Sûriyeyê çareserkirina aştiyane û qanûnî pêkan e.”
‘Polîtîkayên Şamê yekreng û navendî ne’
Di berdewama axaftina xwe de Alî Şapkaci diyar kir piştî hilweşandina rejîma Esed, hikûmeta demkî ya di bin serokatiya Ehmed el-Şara de hat damezrandin. Pratîkên dewletê yên desthilatdar, yekreng û navendî pêk tên. Di demek nêz de êriş, îşkence, komkujî li Elewî, Durzî û herî dawî jî gelê Kurd hatin kirin. Ev jî nîşan dide ku bi awayekî zelal li Sûriyeyê pêvajoyeke tundî û derqanûnî hatiye destpêkirin.”
‘Êrişên derveyî qanûnî şermezar dikin’
Alî Şapkaci da zanîn ku ew wek rêxistinên hiqûqî yên mafan, parastina mafên mirovan li dijî bêhiqûqiyên tên kirin bêdneg nemînin û wiha gotin. “Em qedexekirina xwepêşandan û meşên aştiyane; destwerdana bêpîvan ya hêzên ewlehiyê, sepandina li dijî gel, hilbijartiyan û serokê baroyê şermezar dikin.”
‘Aştî bi rêzgirtina mafan pêkan e’
Di dawiya axaftina xwe de Alî Şapkaci bilêv kir ku bêdengiya Yekîtiya Ewropa û hevalbendên wê nayê qebûlkirin û ev tişt hatin gotin: “Em daxwaza avakirina mekanîzmayên lêpirsînê yên lezgîn dikin da ku bila sûcên şer û hewldanên komkujîyê yên li herêmê werin lêkolînkirin. Aştiyeke mayînde bi rêzgirina îrade û mafên gelan pêkan e.”
