Stenbol – Welatiyên Stenbolî têkildarî êrişên ser Rojava anîn ziman ku divê Rojava nekeve destê çeteyan û wiha gotin: “Parastina Rojava parastina Kurdistanê ye”
Li dijî êrişên li ser Rojavayê yên çeteyên HTŞ, SMO û Tirkiyeyê ji her aliyê Kurdistanê, Tirkiyeyê, Ewropa û cîhanê gel diherike qadan û çalakiyên piştgiriyê li dar dixin. Di çalakiyan de hevkariya Tirkiyeyê û HTŞê tê şermezarkirin û berxwedana Rojava tê silavkirin. Li Stenbolê jî her roj û şev gel li qadan e û çalakiyan li dar dixin. Welatiyên ku tev li çalakiya Taxa Gaziyê ya Sultangaziyê bûne ji Ajana Welat (AW) re axivîn.
‘Divê em bibin yek’
Welatiyê bi navê Yuksel Koç destnîşan kir ku ji bo Rojava, tevahiya cîhanê bêdeng e û ev tişt anî ziman: “Cîhan ji bo Filistînê rabû li ser pêyan lê heman tişt îro li Rojava pêk tê û cîhan bêdeng e. Dema mijar dibe Kurd her kes çawê xwe digirê û bêdeng dibe. Ez gelê Kurd bawer im. Divê em bibin yek û piştgiriyê bidin Rojava.”
‘Êdî bes e ji êrişan re’
Hatîce Aykoç diyar kir ku ew ji bo gelê Rojava daketiye qadan û wiha axivî: “Gelê Kurd îro di bin zordariyê de ye. Zarokên me guneh in. Êdî bes e ji van êrişan re. Em dibêjin berxwedan. Divê gelê Kurd li ber xwe bide.”
‘Divê hemû Kurd xwedî li Rojava derkevin’
Welatiyê bi navê Nurî Rukay jî anî ziman ku îro parastina Rojava parastina her çar parçeyên Kurdistanê ye û ev ev tişt gotin: “Divê tevahî Kurd xwedî li Rojava derkevin. Divê Rojava nekevê deste wan hovan. Divê gelê Kurd rabe li ser pêyan. Ji bona wê jî em dengê xwe bilind dikin. Bang li gelê Kurd dikim ku bila dakevin qadan. Îro em li Stenbolê ne em li qadan in. Em ji bo bibin bersiva seferberiyê li qadan in.”
