Rêveberiya Xweser a Bakur û Rojhilatê Sûrî li Hesekê bi beşdariya bi sedan şêniyên bajêr daxuyanî da. Di daxuyaniyê de plana navneteweyî ya li dijî herêmê hate vegotin û banga xwedîderketina li berxwedana Rojava hate kirin.
Rêveberiya Xweser a Bakur û Rojhilatê Sûrî di derbarê êriş û planên li ser Rojava li bajarê Hesekê daxuyanî da. Daxuyanî bi beşdarbûna bi sedan welatiyên tevlî banga seferberiyê bûne pêk hat. Daxuyanî ji aliyê Cîgirê Hevserokatiya Rêveberiya Xweser Hesen Koçer ve hate xwendin.
Hêzên navnetewî şirîkên komkujiyan in
Hesen Koçer diyar kir êrişên ji 6ê Çileyê ve her ku diçe zêdetir dibin û ev tişt anî ziman: “Ev êriş bi armanca tunekirina gelê Kurd û hêzên demokratîk e. Armanca wan ew e ku Rêveberiya Xweser tune bikin. Îro dixwazin DAIŞê vejînin û bi wan gelê herêmê tune bikin. Berxwedana îro li girtîgeha El Eqtan a li bajarê Reqayê ku bi sedan çeteyên DAIŞê tê de girtî ne, mînak e. Hîn li wir şervanên HSDê bi hemû hêza xwe berxwedaneke bêhempa dikin. Tevî êrişan jî hêzên li dijî DAIŞê destwerdanê nakin. Ev tê wateya hêzên navneteweyî şirîkên komkujiyan in.”
Divê em hemû ji bo parastinê amade bin
Hesen Koçer di berdewama axaftina xwe de destnîşan kir ku gelê Kurd li dijî şerê tunekirinê derketiye û ji tevahî gelê Kurd xwest parastina destkeftî û rûmeta xwe bikin. Koçer wiha pê de çû: “Îro rûmeta gelê Kurd dikin hedef. Neteweya Kurd di bin êrişan de ye. Lewma divê em hemû ji bo parastinê amade bin.”
Hesen koçer got, “Maskeyên rûyê hêzên navneteweyî aşkera bûne û rastiya wan di ne destwerdana girtîgehên DAIŞê de diyar bû” û wiha dewam kir: “Diyar bû ew dixwazin dewleteke terorîst li ser desthilatdariya Sûriyeyê be. Wê jî li dijî Heşdî Şebî ya li Iraqê bidin şerkirin. Divê gelê me ji bo parastinê amade be. Em ê hemû destkeftiyên gelê xwe biparêzin. Divê gelê Kurd dest ji malên xwe bernede.”
Em ê tu carî dest ji xaka xwe bernadin
Hesen Koçer her wiha bang li hêzên demokratîk ên cîhanê kir ku xwedî li berxwedana Rojava derkevin û wiha axivî: “Bila gelê Kurd li hemû welatên cîhanê çalakiyan li dar bixe û bi taybet li welatên Ewropayê. Divê em bibin xwedî biryar.”
Hesen Koçer di dawiya axaftina xwe de got: “Em ê tu carî dest ji xaka xwe bernadin, me aştî xwest lê wan xwest teslîmiyetê li ser me ferz bikin. Di civîna dawîn de dibêjin çekên xwe deynin û teslîm bibin.”
