Saziyên Kurdan ên li Amerîkayê û dostên wan dê li dijî êrişên ser Rojava û Rojhilatê Kurdistanê çalakiyan li dar bixin.
Saziyên Kurd ên li Dewletên Yekbûyî yên Amerîkayê (DYA), dê roja Çarşemê li ber avahiya Kongreya Amerîkayê ya li paytext Washingtonê û roja şemiyê jî li pêşiya avahiya Neteweyên Yekbûyî (NY) ya li New Yorkê li dijî êrişên HTŞê yên li ser Rojavayê Kurdistanê û ji bo gelê rojhilatê Kurdistanê dê çalakiyan li dar bixin.
Dê peyama ‘bêdeng nemînin’ bê dayîn
Parêzvanên Kurd ên Amerîkayî (American Kurdish Advocates – AKA), dê di 21ê Çileyê de li pêşiya avahiya kongreyê bi dirûşma “Kurdên li Sûriyeyê biparêzin” çalakiyê li dar bixin. AKAyê, li ser hesabê xwe ya medyaya dijîtal got: “Bi daxwaza parastina Kurdên li Sûriyeyê ku bi êrişên hikûmeta demkî ya Sûriyeyê re rû bi rû ne, em ê li pêşiya Kongreya Amerîkayê çalakiya protestoyî li dar bixin. Bêdengî ne tercîhek e.”
Di 24ê de Kurd dê li ber avahiya NYê bin
Di 24ê Çileyê de jî dê 8 saziyên Kurd li pêşiya avahiya NYê ya li New Yorkê çalakiyê li dar bixin. Bangên saziyan ên têkildarî çalakiyan wiha ne: “Şerê li dijî Kurdan bidin sekinandin. Sivîlên Kurd ên li Rojava û Rojhilat bi tundî, koçberî û tirsê re rû bi rû ne. Ev karesateke însanî ye û bêdengî vê rewşê hêj girantir dike. Ji bo balê bikişînin ser krîza însanî ya li Rojava û serhildana li Rojava, em tên gel hev. Ev, ji bo piştevanî, edalet û mafên mirovan bangek e.”
Saziyên ku bang kirin ev in: “Navenda Çanda Kurd a New Yorkê (NYKCC), Tifaqa Kurd a Cûdî (JudiKA), Komîteya Rewşa Lezgîn a Rojava, City Kurds, Parastvanên Kurd ên Amerîkayî (American Kurdish Advocates – AKA), Enstîtûya Xebatên Kurdî yên Zanîngeha Rutgersê, Tifaqa Kurd a Amerîkaya Bakur û Komeleya Kurd a Amerîkan (American Kurdish Association-AKA).”
