Gelê Silêmaniyê ji bo piştgiriya berxwedana gelê Rojavayê Kurdistanê çalakiyeke girseyî lidar xist. Di çalakiyê de êrişên çeteyan yên li ser deverên di bin desthilata HSDê de bi tundî şermezar kirin.
Îro li Parka Baxê Giştî ya Silêmaniyê, bi beşdariya gelek welatî û kesayetên ji pîşeyên cuda, ji bo piştgiriya xwe ji berxwedana niha li Rojavayê Kurdistanê li hemberî çeteyên girêdayî Ehmed Şera, çeteyên dewleta Tirk û çeteyên DAIŞê tê kirin, çalakiyek girseyî hat lidarxistin.
Di çalakiyê de hate gotin ku ev komploya navnetewî li dijî ezmûna Rêveberiya Xweseriya Demokratîk a Bakur û Rojhilatê Sûriyeyê ye û dan diyarkirin ku ya ku niha diqewime heman hişmendiya DAIŞê li pişt vê komkujiya Kurdane.
Di çalakiya girseyî ya xelkê Silêmaniyê de daxuyanî ji çapemeniyê re hate dayîn. Daxuyaniya nivîskî ji aliyê rojnamevan Hawkar Îzet ve hate xwendin.
Di daxuyaniyê de wiha hate gotin; “Mixabin, ji ber planên welatên herêmî û bêdengiya navnetewî, Rojavayê Kurdistanê bi xeteriyeke mezin re rûbirû ye û ew dixwazin deverên rizgarkirî vegerînin destê tundrewan û şaneyên razayî yên DAIŞê vejînin. Welatên ku li Sûriyeyê xwedî biryar bûn, beşek ji vê konsepta qirêj ya li dijî gelê Kurde.
Silêmanî, wekî beşek yekgirtî ya doza rewa ya Kurd, ji bo her cûre alîkarî û piştgiriyê amade ye da ku doza siyasî ya Kurd bi dehan salan paşde neçe.”
Her wisa Dr. Şêrko Heme Emîn û Berîvan Mihemed banga yekîtîya di navbera partîyên Kurdî de kirin û daxwaza vekirina demildest ya Deriyê Sêmalka kirin da ku alîkarî bigihîje xwişk û birayên wan yên li Rojava û bi qeyrana mirovî ya ji ber şer çêbûye re bi têbikoşin.
