Li bajarên Bakurê Kurdistan û metropolên Tirkiyeyê di nav hefteyek dawî de heta niha nêzî 200 kesî di çalakiyên xwedîderketina li Rojava de hatin binçavkirin. Ji van 200 kesan 10 kes hatine girtin.
Çeteyên HTŞ û SMOyê ku di 6ê Çileyê de êrişek berfireh li dijî taxên Kurdan Şêxmeqsûd, Eşrefiye û Benî Zêdê dabûn destpêkirin û komkujî li dijî xelkê taxan pêk hatin. Li bajarên Bakurê Kurdistanê û bajarên rojavayê Tirkiyeyê jî li dijî êrişên li ser Rojava çalakî, meş û daxuyanî tên lidarxistin û her ku diçe hêrsa li dijî êrişan zêdetir dibe.
Li gelek bajaran meş, daxuyanî û çalakiyên cur bi cur tên lidarxistin. Polîs gelek caran bê ser û bger êrişî çalakiyan dikin û çalakvanan binçav dikin. Di van çalakiyan de nûçegihanê me Nedîm Orûç jî ku li Cizîrê nûçe dişopand, hat binçavkirin. Her wiha di rojên dawî de polîs bi ser malên de digirin û welatiyan dixin binçavan.
Li Cizîrê zarokek hat girtin
Li Şirnex û navçeyên wê Cizîr û Silapiyayê di navbera 8 û 14ê Çileyê de bi giştî nêzî 30 kesan hatin binçavkirin. Di 8ê çileyê de li navçeya Cizîrê gel xwest êrişan protesto bike, lê polîsan êrişî girseyê kir û 3 ciwan bi lêdanê kirin binçavan. Polîsan xeberên nexweş ji rojnamegeran re jî gotin û gefa kuştinê li wan xwarin. Ciwanên hatine binçavkirin, roja din hatin berdan.
Di 13ê Çileyê de li Silopiya û Cizîrê polîsan bi ser gelek malan de girt û di nav de zarok jî hebû, 17 kes binçav kir. Di nava van kesan de zarokê bi navê R.A. yê 15 salî bi hinceta “emdantiya rêxistinê” hat girtin û kesên din jî bi şertê kontrola edlî hatin berdan. Di 14ê Çileyê de jî ciwanan li taxa Nûrê ya Cizîrê êrişên li ser Rojava protesto kirin. Polîsan li vir jî tevî nûçegihanê me Nedîm Orûç 5 kes binçav kirin û ev 5 kes hê jî di bin çavan de ne.
Li Amedê 4 kes hatin girtin
Li Amedê di 12ê Çileyê de polîsan bi ser malan de girt û Baran Çinar, Hayat Ozmez, Muhammed Altinkaya û Roza Bakî binçav kirin. Her 4 kesên ku ev 4 roj in di binçavan de bûn, îro ji aliyê Dadgeha Silh û Sizayê ya 1emîn a Amedê ve hatin girtin.
Li Mêrdîn û navçeyên wê jî binçavkirin çêbûn
Di 13ê Çileyê de li navçeyên Qoser û Artûklûyê polîsan bi ser malan de girt û gelek ciwan hatin binçavkirin. Herî dawî di 15ê Çileyê de polîsan li navçeya Qoserê careke din bi ser gelek malan de girt û Mehmet Nûr Tanirgan, Emîr Çakir, Yûsûf Elîş, Alî Tûrgay û Tacettîn Aslan binçav kir. Pêvajoya binçavkirinê hê jî didome.
Li Wanê 17 ciwan di bin çavan de ne
Li Wanê jî di 14ê Çileyê de polîsan bi ser gelek malan de girt û 7 ji wan zarok 17 ciwan binçav kirin. Dema binçavkirina ciwanan hat dirêjkirin û pêvajo didome.
Li Êlihê 23 kes hatine binçavkirin
Di navbera 10 û 15ê Çileyê de li taxên Baglar, Çamlitepe û Bayindirlik yên Êlihê polîsan di demên cuda de bi ser malan de girt û bi giştî 23 kes binçav kirin. Di nav van de kesek hat girtin.
Li metrepolên Tirkiyeyê jî ciwan hatin biçavkirin
Her wiha gelek bajarên Tirkiyeyê jî di demên cuda de gelek kes hatin binçavkirin. Li Edeneyê 7, li Mêrsînê 4 û li Stenbolê jî di çalakiyên cuda de 105 kes hatin binçavkirin û ji van 105 kesan 4 kes hatin girtin.
Vê sibehê polîsan dîsa li navçeyên Stenbolê bi ser malan de girt û herî kêm 15 kes kirin binçavan.
