DBPê nerazîbûn nîşanî êrişên li dijî taxên Kurdan Şêxmeqsûd û Eşrefiyê da û diyar kir ku taxên Kurdan bi zanebûn dikin cihê şer, êriş plankirî û siyasî ne û dixwazin bi van êrişan îhtîmala çareseriyê were sabotekirin.
Partiya Herêmên Demokratîk (DBP) li ser êrişên ku ji duh ve li ser taxên Şêxmeqsûd û Eşrefiyê têne domandin, daxuyaniyek belav kir. Di daxuyaniyê de hate diyarkirin ku ev êrişên pêk tên dekûdolabên kesên li dijî çareseriyê ne, divê mirov van dekûdolaban baş bibîne li tevahiya Sûriyeyê nebe sedema şer û pevçûnên bêveger.
Daxuyaniya DBPê bi vî rengî ye:
“Êrişên ku ji duh ve li ser taxên Şêxmeqsûd û Eşrefiye yên bi serê Helebê ve berdewam dikin, ji ber ku rasterast sîvîlan dike hedef, sûcên li dijî mirovahiyê ne.
Ev êrişên ku ji aliyê komên çekdar ên ser bi Hikûmeta Demkî ya Sûriyeyê ve bi tankan û bombebaraneke giran têne meşandin, bûne sedema windahiyên sivîl ku di nav wan de zarok jî hene.
Taxên Kurdan bi zanebûn dikin cihê şer
Bi awayekî sîstematîk hedefgirtina qadên niştecîhan nîşan dide ku mafê jiyanê yê sivîlan bi zanebûn tê binpêkirin û taxên Kurdan bi zanebûn dikin warê şer û pevçûnan. Ev tablo nabe ku tenê wekî ‘şerekî leşkerî’ bê dîtin.
Tiştên diqewimin ne tesadufî ne
Tiştên diqewimin, binpêkirina hiqûqa navneteweyî ya mirovî ye. Bi êrişên ku di saetên şevê de jî berdewam kirin, Şêxmeqsûd û Eşrefiyê bi awayekî fîîlî hatine dorpêçkirin û zemîna operasyoneke berfirehtir û wêrankertir tê amadekirin. Ev ne tesaduf e; tercîheke bi zanebûn, plankirî û siyasî ye.
Îhtîmala çareseriyê tê sabotekirin
Ji aliyê din ve di pêvajoyeke ku entegrasyona Hêzên Sûriya Demokratîk (HSD) bo artêşa Sûriyeyê tê nîqaşkirin û têkilî û lêgerînên çareseriyê di navbera aliyan de di rojevê de ne, pêkhatina van êrişan ne tişteke ji rêzê ye.
Ev rewş nîşaneyên xurt dihewîne ku tiştên diqewimin ji aliyê kesên li dijî çareseriyê bi armanca sabotekirina îhtîmala çareseriyê hatine plankirin. Ev êrişên ku Kurdan dikin hedef, ne tenê îro, di siberojê de jî îhtîmala lihevkirineke siyasî siberoja Sûriyeyê jî dînamît dikin. Ev êrişên ku Kurdan dikin hedef, ne tenê binê zemîna îro ya lihevhatinê her wiha binê zemînên lihevkirinên siberojê jî dînamît dike.
Hêzên êrişkar divê bêne sekinandin
Hêzên navneteweyî û hemû aktorên peywendîdar êdî divê ji pozîsyona temaşevan derkevin. Divê ji bo parastina sivîlan demildest berpirsiyarî bê girtin, êriş bi lez bên rawestandin û hêzên êrişkar bi eşkereyî bên teşhîrkirin. Nexwe, tiştên li Helebê diqewimin dê bibin sedema wêraniyên mezin û şikestinên bêveger li seranserê Sûriyeyê.”
