Wan – Endamê Komeleya Ekolojiyê ya Wanê Sedat Alkan bal kişand ser esasên civakê û got: “Sê baskên civakê hene; yek demokrasî ye, yek azadiya jinan e û yek jî ekolojî ye. Lewma divê baskê ekolojiyê kêm nemîne.”
Di salên dawî de li Bakurê Kurdistanê gelek saziyên ekolojiyê hatin avakirin û dest bi çandina daran kirin. Komeleya Ekolojiyê ya Wanê jî di herêma Serhedê de bi komkirin û çandina tovên darên berûyê dest bi xebatên xwe kir. Komeleya Ekolojiyê hewl dide ku bihara bê, biçe li gundan û rê û rêbazên çandiniyê bi gel re parve bike. Komele û saziyên ekolojiyê dixwazin bi her awayî xwedî li xwezayê derkevin, biparêzin û ji bo siberojê her der şîn û şîndar bikin. Ev saziyên navborî bi taybetî li bakurê Kurdistanê bi çandina daran dixwazin dar û daristanan ji nû ve şîn bikin û rê li ber talanê bigirin.
2 hezar tovên berûyan çandin e
Endamê Komeleya Ekolojiyê ya Wanê Sedat Alkan derbarê xebatên komeleyê de diyar kir ku payiza çûyî li Xerzan û Botanê tovên berûyan hatine berhevkirin û got: “Me nêzî 2 hezar tov li geliyê Goşkar, Gimgimê, Zîlanê heta Bêgiriyê û Westanê çandin. Derveyî çandinê ji bo avakirina hişmendiyeke ekolojîk em tev li perwedehiya ekolojiyê ya OHD, Baroya Wanê û çend saziyên din bûn. Me xwest em li Wanê meclîseke ekolojiyê jî ava bikin.”
Li gund û navçeyan komîsyonên ekolojiyê
Sedat Alkan da zanîn ku gelek plansaziyên wan hebûn, lê ji ber ku derfet nebûn ev xebat pêk nehatin û wiha got: “Yek ji wan jî çûyîna gundên ku çandiniyê dikin bû. Armanc ew bû ku em li van gundan derbarê çandiniyê de civînan pêk binîn ku ka çandiniyek baş çawa pêk tê kirin. Ax çawa zerarê nebîne an jî kîjan berhem li kîjan axê de baş şîn dibin. Helbet van planên xwe em ê di pêşerojê de pêk bînin. Em dixwazin di sala nû de van planên xwe pêk bînin. Heta armanca me biçe serî em ê biçin hemû gundan. Em dixwazin hem li gundan hem li navçeyan komîsyonên ekolojiyê ava bikin.”
‘Berfa îsal dê biharê bi bereket bike’
Sedat Alkan destnîşan kir ku mezinên wan her dem behsa barîna berfê dikirin û digotin berf xêrûbera salê pirr dike û got: “Em dibînin ku di van bîst salên dawî de berf kêm dibare. Sedema vê jî bandora kapîtalîzm û endustriyalîzmê ye ku hevsengiya xwezayê diguherîne. Li Wanê jî berfa berê nemaye, wek berê nabare. Wekî tê gotin berf bereket e, cihê ku berf nebare çandinî kêm dibe û av û kanî jî ziwa dimînin. Berf bi her awayî bandorek erênî li ser xwezayê dike. Berfa îsal qet nebe jî dê ji bo bihara bê bibe bereket.”
Avakirina hişmendiyeke ekolojîk
Sedat Alkan da zanîn ku armanca wan a yekemîn avakirina civakeke ekolojîk e û ev tişt got: “Divê civak bi hişmendiyeke ekolojîk were avakirin. Sê baskên civakê hene; yek demokrasî ye, yek azadiya jinan e û yek jî ekolojî ye. Ev baskê ekolojiyê divê kêm nemîne. Bi halê heyî ji bo biharê jî me tovên berûyan berhev kirin e. Li Mêrdîn û Botanê nêzî sed hezar tov me di depoyan de hiştine. Wekî tê penasekirin dibêjin sînorê Kurdistanê bi darên berûyê tê diyarkirin. Avakirina daristanan li Serhedê wê berdewam bike. Ew daristanên me yên qala wan dihat kirin ku hatine birîn û talankirin, em ê careke din li Kurdistanê şîn bikin.”
Şer û ekolojî
Sedat Alkan diyar kir ku şer ji bo ekolojiyê qirkirina herî mezin e û axaftina xwe wiha bi dawi kir: “Dema şer bisekine em bawer dikin ku avakirina hişmendiya ekolojîk û çandina daristanên nû dê hêsantir be. Ev pêvajo bi ser bikeve û ser nekeve jî em ê xebatên xwe bimeşînin. Bes ku ser bikeve tiştên ku em dixwazin dê zûtir pêk bê.”
