Colemêrg – Ji ber berfa zêde ya ev 4 roj in li Colemêrg û navçeyên wê dibare, 7 aşût li ser rêya Colemêrg-Wan û Colemêrg-Şirnexê hatine xwarê. Hate ragihandin ku li Colemêrgê rêyên 110 gund û 247 mezrayan hatine girtin.
Li Colemêrg û navçeyên wê berfa ku 4 roj in bê navber dibare, jiyana rojane ya mirovan zehmet dike. Bilindahiya berfê ya hinek cihan gihiştiye mîtroyekî û li gelek deveran jî aşût hatine xwarê. Rêyên Colemêrg-Wan û Colemêrg-Şirnexê jî ji ber aşûtan bi tevahî ji bo trafîkê hatine girtin. 3 aşût li ser rêya Colemêrg-Wanê û 4 aşût jî li ser rêya Colemêrg û Şirnexê hatine xwarê. Ji ber xebata nebaş a Midûriyeta Rêyên Bejayî û şaredariya di bin rêveberiya qeyûm de li tevahiya Colemêrgê rêyên 110 gund û 247 mezrayan hatine girtin.
Li navenda bajêr jî ji ber ku du roj in xebatên paqijkirina berfê nehatine kirin, welatî zehmetiyan dikişînin.
