Serokwezîrê Îsaîlê Benjamîn Netanyahû piştî hevdîtina duh bi Nûnerê Taybet ê Sûriyeyê yê Trmup Tom Barrack re pêk anî, daxuyand ku DYA û Îsraîl di mijara Sûriyeyê de hemfikir in. Fermandarê malnişîn ê Îsraîlê Yagur jî anî ziman ku ji çar armancên Îsraîlê yên li Sûriyeyê yek jî ew e ku tu hebûna Tirkiyeyê li vî welatî tune be.
Serokwezîrê Îsaîlê Benjamîn Netanyahû duh bi Nûnerê Taybet ê Sûriyeyê yê Trump, Tom Barrack re hevdîtin pêk anîbû. Wezîrên karên hundir û derve, serfermanderê giştî û berpirsyarên saziyên ewlehiyê yên Îsraîlê jî tev li civînê bibûn. Barrack di parvekirina li ser hesaba xwe ya Xê de diyar kiribû ku hevdîtineke gelek çêker kirine. Netanyahû îro li ser mijarê axivî û diyar kir ku DYA û Îsraîlê têkildarî mijara Sûriyeyê hemfikirin û wiha got: “Em li ser gefên ji aliyê Sûriyeyê ve pêk tên rawestiyan. Her du welat jî xwedî daxwazin ku li hemberî van gefan rawestin. Her wiha ji bo hevîtinên peymaneke van gefan bi tevahî ji holê rake jî em li hev hatin.” Li gorî nûçeyên ku di çapemeniya Îsraîlê derketin de jî çavkaniyên ewlehiyê anîn ziman ku piştî hevdîtina duh êdî her du alî jî dizanin ka dê çi bikin.
‘Divê tu hebûna Tirkiyeyê li Sûriyê tune be’
Fermandarê malnişîn Amît Yagur jî ji çapemeniya Îsraîlê re axivî û ev nirxandin kirin: “Çar hedef û armancên Îsraîlê li Sûriyeyê hene. Yek, divê Sûriye nebe wekîlê Tirkiyeyê. Didu, divê di serî de leşkerî tu hebûnên Tirkiyeyê tune bin. Sisê divê çekdarên Golanî li herêmên nêzîk sînorê Îsraîlê cih nebin. Çar, divê komkujiyên nû li hemberî gelê Durzî pêk neyê û destûr neyê dayîn Sûriye vegere dewleteke şerîatê. Divê em armanca bi awayekî israr bên parastin û peymanên tevgera Îsraîlê asteng dikin, neyên qebûl kirin.
‘Tirkiye dixwaze Hamasê biparêze’
Wezîrê Karên Derve û Wezîrê Parastinê yê berê Lieberman jî li ser israra Tirkiyeyê ya çûyîna Xezayê sekinî û wiha axivî: “Li cîhanê niha dewleta bi israr dixwaze bê Xezayê tenê Tirk in. Ev pêvajoyeke bi cihbûnê ye. Ger ku bên kes nikare wan ji Xezayê derbixe. Ev yek jî dê operasyonên me yên li Xezayê asteng bike. Ji bo bêçekkirina Hamasê nayên, ji bo parastina Hamasê dixwazin bên.” Lieberman balkişand ser îhtîmala kirîna balefirên F-35 jî û wiha domand: “Ger Tirkiye van balefiran ji Amerîkayê bikire, li Sûriyeyê cih bibe û heta Xezayê bê, dê dengeya hêzê ya herêmê bi awayekî dramatîk biguhere. Ev yek niha min gelek aciz dike.”
