Amed – Bi pêşengtiya Platforma Şiyar Be dê di 14ê Kanûnê de li Licêyê li dijî fihûş û tiryakê meşek bê lidarxistin. Siyasetmedar û rêveberên saziyên sivîl banga beşdariya meşê li gel kirin û gotin: “Rabin ser pêya û li Licê xwedî derkevin. Em ê li dijî fihûş û tiryakê bimeşin.”
Di 14ê Kanûnê de li Licê bi şîara “Em rê nadin tiryak, fihûş û şerên taybet” dê meşek bê lidarxistin. Meş bi pêşengiya Platforma Şiyar Be dê pêk were û gelek sazî û dezgeh tev li meşê dibin. Hevseroka Giştî ya Partiya Herêmên Demokratîk (DBP) Çîgdem Kiliçgun Uçar jî dê beşdarî meşê bibe. Ji bo meşê amadekarî tên û bang li gel tê kirin ku tev li meşê bibe.
Hevserokên Rêxistina DEM Partiyê ya Navçeya Licê û rêveberên saziyên sivîl bang li gel kirin ku tev li meşê bibe û gotin pêwîste her kes xwedî li Licê derkeve.
‘Divê gelê Licê rabe ser pêya’
Endama Komeleya Piştevaniya bi Malbatên Girtî û Hikûmxwaran re (TUAY-DER) ya Amedê Yesure Tufan diyar kir ku ew ê dê di 14ê Kanûnê de li dijî fihûş û tiryakê bimeşin û got: “Ez bang li tevahî gelê Licê û Amedê dikim; bila tev li meşê bibin. Ez dibêjim gelê Licê rabe ser pêya û xwedî li Licê derkeve. Îro Licê bi destê fihûş û tirkayê tê qirêjkirin. Em naxwazin Licê xera bibe. Li Kurdistanê serhildana herî mezin li Licêye pêk hatibû. Îro jî serhildana herî mezin dê dîsa li Licê pêk were. Licê ji bo me girîng e, Licê warê şeran e. Licê li pişt vîna û hebûna xwe ye.”
‘Mil bidin milê me’
Hevseroka DEM Partiyê ya Licê Nazife Maltaş jî anî ziman ku ew ê di 14ê Kanûnê de li Licê meşekê mezin li dar bixin û wiha got: “Em gelê xwe dawetî meşê dikin. Em dixwazin gelê me tev li ve meşê bibe û mil bide milê me.”
‘Em tevahiya gelê xwe vedixwînin meşê’
Rêveberê MEBYA-DERê Halîs Aksakal jî diyar kir ku ew ê li dijî fihûş û tiryakê bimeşin û got: “Di 14ê Kanûnê de em dimeşin. Em dixwazin tevahiya gelê me were tev li meşê bibe. Em ê li dijî fihûş û tiryakê nerazîbûna xwe nîşan bidin.”
‘Ev meş ji bo tevahiya gelê Licê ye’
Hevserokê DEM Partiya Licê Berzan Peker jî bi bîr xist ku ew roja 14ê Kanûnê li dijî fihûş û tiryakê dê bimeşin û diyar kir ku ev meş ji bo tevahiya gelê Licê dê pêk were û got: “Ji bona wê divê gelê Licê tev li meşê bibe.”
