Wan – Endamên Meclisa Dayikên Aştiyê yên Wanê diyar kirin ku ew dixwazin bi Rêberê Gelê Kurd Abdullah Ocalan re hevdîtinê bikin û gotin: “Heta em gotinên wî jî devê kesên cuda bibihîzin em dixwazin rasterast wî guhdar bikin.”
Meclisa Dayikên Aştiyê duh ji bo di Komîsyona Îmraliyê ya Partiya Wekhevî û Demokrasiyê ya Gelan (DEM Partî) cih bigirin û biçin Girava Îmraliyê bi Rêberê Gelê Kurd Abdullah Ocalan re hevdîtinê bikin, li gelek bajarên Kurdistan û Tirkiyeyê daxuyaniyek da. Di daxuyaniyê de bang li Wezareta Dadê û wezîr kiribûn ku ji bo çûyîna Îmraliyê destûrê bidin wan.
Endamên Meclîsa Dayikên Aştiyê ku derbarê mijarê de ji ajansa me re axivîn û gotin ku divê ew Rêberê Gelê Kurd Abdullah Ocalan bibînin.
‘Em ê ji Abdullah Ocalan hêzê bigirin’
Dayika Aştiyê Zekiye Kayayê diyar kir ku Rêberê Gelê Kurd Abdullah Ocalan ji bo aştiyê bangawazîyek kir û bi lêv kir ku lewma gel hemû ji bo aştiyê rabûye ser pêyan. Zekiye Kayayê bi lêv kir ku helbet ên naxwazin aştî çêbibe jî hene û got: “Ew kes ji ber armanc û bazirganiya xwe naxwazin. Lê em bang li wan jî dikin, hindî gavek ji gavekê zutir bê avêtin dê ji bo aşitîyê ewqas baş be. Heta Serokatî azad nebe gelê Kurd jî yê Tirk jî azad nabe. Herkes bila destê xwe dane ser wijdana xwe. Em Dayikên Aştiyê jî dixwazin biçin wî bibînin, em ê jê hêzê bigrin. Bi salane ji bo herkesî destê xwe dirêjî aşitîyê dike. Mifteya aştiyê di destê Serokatî de ye.”
‘Bila êdî xwîn neyê rijandin’
Dayika Kadriye Gezîciyê jî anî ziman ku ew çend sal in ji bo aştiyê li ber xwe didin û wiha axivî: “Em çiqas hatine kuştin û girtin jî dîsa em dibêjin aştî. Divê em hemû bi hev re deng bidine vê aştiyê. Em bang li dayikên leşker û polîsan, bang li hemû Kurdên ku heta niha tiştek nekirine jî dikin bila tev li me dayikan bibin, bila destê xwe bidin vê aştiyê. Bila êdî xwîna tu kesî neyê rijandin. Em dixwazin Serokatî bibînin. Heta em dê gotinên wî jî devê kesên cuda bibihîzin em ê rasterast ji wî guhdar bikin.”
‘Em dixwazin bi Serokê xwe re hevdîtinê bikin’
Dayika Şahîne Îşleyenê ji bo Rêberê Gelê Kurd Abdullah Ocalan silav şandin û got ku ew ji bo aştiyê çêbike dixebite. Şahîne Îşleyenê diyar kir ku di rêya aştiyê de gelek bedel hatine dayîn û ev tişt got: “Em aştiyê dixwazin, em dibêjin bila êdî dayikên Kurdan jî yên Tirkan jî negirîn. Kî dibe bila bibe em ji bo hemû kesan aştiyê dixwazin. Aştî hatiye ziman lê ti gav ji aliyê dewletê ve nehatiye avêtin. Zarokên me ji çiya hatin çekên xwe şewîtandin, lê Erdogan gavek jî ne avêtiye. Em vê yekê qebûl nakin. Em dixwazin bi Serokê xwe re hevditînê bikin. Şûna ku em ê ji kesan bipirsin û gotinên wî bibihîzin, em dixwazin ji wî bi xwe bibihîzin. Bila dayîk jî jin jî biçin cem Serok ku em bizanibin ka çi dibêje.”
‘Bila dayikên tu kesan negirîn’
Dayika Nazli Acarê ji bo Îmraliyê û hemû girtiyên siyasî silav şandin. Di berdewamiyê de Nazli Acarê diyar ku ew ji bo Serokê xwe kom bûne û wiha berdewam kir: “Em daxwaza berdana Serokê xwe dikin. Serokatî banga çek danînê kir û yên me jî çekên xwe şewitandin. Bila dewlet jî pêngavekê biavêje. Em dixwazin biçine cem Serokatî, em wî jî bi xwe re bînin cem gelê xwe. Bes e êdî bila ev xwîne bisekine. Bila dayîkên tu kesan negirîn. Her yekî ji me zarokên xwe dane. Ev çend sal in em dibêjin aştî, xwişk û biratî, lê ew çi pêngavan naavêjin.”
‘Bila Kurdên me bibin yek’
Dayika Aştiyê Rabîa Algorê jî binê wê xêz kir ku heta mirov derê mala xwe paqij neke mirov nikare derê mala kesên din paqîj bike. Rabîa Algorê bal kişand ser yekitiya neteweyî û ev tişt anî ziman: “Ez hêvî û ricayan bi dilekî sotî dikim ku bila Kurdên me bibin yek. Bi yekitiyê em ê serbikevin. Dewletê derbarê pêvajoyê de hêj çi gav neavêtine. Serokatî got çekên xwe bişewitînin û rêxistinê jî li ber çavên herkesî şewitandin. Ka qet dîsa gavek avêtin? Lê baweriya me bi me heye, em her çar parçeyên Kurdîstanê bibin yêk em ê serbikevin û aştiya me jî dê çêbe.”
