Amed – Hevserokê MED TUHAD-FEDê Kerem Canpolat destnîşan kir ku ew hevdîtin û peyama Abdullah Ocalan bi wate û hêja dibînin û got: “Divê hemû siyasetmedarên vî welatî, desthilatdarî û muxalefet û gelên Tirkiyeyê guh bidin bang û peyamên birêz Abdullah Ocalan.”
Şandeya DEM Partiyê ku ji Pervîn Buldan û Sirri Sureyya Onder pêk dihat di 28ê Kanûnê de li Girtîgeha Girava Îmraliyê bi Rêberê PKKê Abdullah Ocalan re hevdîtin pêk anî. Şandeyê di 29ê Kanûnê jî bi daxuyaniyek nivîskî nêrîn û fikrên Abdullah Ocalan bi raya giştî re parve kir. Şandeya siyasî herî dawî di meha nîsana sala 2015an de li gel Abdullah Ocalan hevdîtin pêk anîbû. Ji wê rojê ve tecrîdkirina Abdullah Ocalan hatibû dijwarkirin û ji 21ê Adara 2021an ve agahî jê nedihat girtin.
Hevserokê Federasyona Komeleyên Hiqûq û Piştevaniyê ya Malbatên Girtî û Hikûmxwaran a Medê (MED TUHAD-FED) Kerem Canpolat derbarê hevdîtin û peyama Abdullah Ocalan de ji Ajansa Welat re axivî.
‘Em hevdîtin û peyamê bi wate dibînin’
Kerem Canpolat diyar kir ku ew çûyîna cem Rêberê PKKê Abdullah Ocalan bi wate dibînin û got: “Em vê gav avêtinê baş dibînin. Em hêvîdar in ev gavavêtin ji bo welatê me Kurdistanê û ji bo Tirkiyeyê bibe gavên çareseriyê û mafên mirovan bi ser bikeve. Bibe gavên ku gelê Kurd bigihîje hemû mafên xwe yên demokratîk.”
Kerem Canpolat destnîşan kir ku ew wek TUHAD-FEDê û siyaseta gelê Kurd û dostên wan ev salek û nîv e kampanyayek ji bo bi Abdullah Ocalan re hevdîtin çêbibe li qadan bûn û wiha got: “Em ê hê jî li qadan bin. Ji bo hevdîtina ku pêk hat, em vî gavî pîroz dibînin. Ji bo şer raweste ev hevdîtin û peyam bi nirx in.”
‘Divê hemû kes guh bide vê bangê’
Kerem Canpolat anî ziman ku Abdullah Ocalan Ocalan dixwaze aştî li vî welatî pêk were û wiha axivî: “Birêz Ocalan dixwaze di navbera hêzên ku li hev dixin de aştî û çareseriyek pêk were. Birêz Abdullah Ocalan berê jî gavên ji bo aştî û çareseriyê avêtibû û her tim bang dikir. Niha jî ji bo ev gotinên wî yên bi wate li hewa nemînin divê her kes bikeve nava hewldanan. Birêz Abdullah Ocalan dîsa wek her carê îradeya xwe nîşan da. Ew hêz û baweriya wî ya çareseriyê heye. Divê hemû siyasetmedarên vî welatî, hemû desthilatdarî û muxalefet destê xwe bidinê. Ji bo ku Kurdistan û Tirkiye ji nava aloziyên li Rojhilata Navîn rizgar bibe. Dîsa ez dubare dibêjim, lazim e desthilatdarî û dewlet bang û peyama birêz Abdullah Ocalan li hewa nehêle. Wê ev yek hemû gelên li Rojhilata Navîn ji nava vî şerê heyî derxe. Em bang li hemû hêz, sazî, dezgeh û gelan dikin ku guh bidin vê bangê û îradeya xwe ji bo çareseriyê bixin dewrê.”
‘Êdî dema azadiya birêz Abdullah Ocalan hatiye’
Kerem Canpolat da zanîn ew dixwazin ev hevdîtin hin rehet û baştir bi rê ve biçe û got: “Ji bo ku ev pêvajo bi hêsanî bi rê ve biçe divê birêz Abdullah Ocalan bigihîje azadiya xwe ya fizîkî. Êdî dema wê hatiye ku birêz Abdullah Ocalan bi awayek fizîkî li derve be. Da ku bi hemû aliyên vî welatî re hevdîtinan dikaribe çêbike ku çareserî zûtir pêk were.”
