TJAyê bertek nîşanî serdegirtina polîsan a bi ser Galeriya Hunerê û komkirina wêneyên jinan da û diyar kir ku ew vê pêkanîna dewlet û mêran qebûl nakin.
Tevgera Jinên Azad (TJA), duh di çarçoveya xebatên 25ê Mijdarê Roja Têkoşîna Li Dijî Tundiya Li Ser Jinan li Galeriya Hunerê ya Şaredariya Rêya Armûşê pêşengeha wêneyan a “Jinên ku jiyan tev li dîrokê kirine” vekiribû. Duh şev polîsan bi biryara walitiyê bi ser Galeriya Hunerê de girt û wêneyên 7 jinan kom kirin û li galeriyê lêgerîn kirin. Bi pêşengtiya TJAyê li ber Galeriya Hunerê ku polîsan bi ser de girtibû, daxuyanî hat dayîn û jin û nûnerên saziyan bertek nîşanî serdegirtin û komkirina wêneyan da. Hevşaredarê Bajarê Mezin ê Wanê Abdullah Zeydan, parlementera Partiya Wekhevî û Demokrasiyê ya Gelan (DEM Partî) ya Wanê Gulderen Varli, Meclîsa Dayikên Aştiyê û nûnerên saziyên sivîl tev li daxuyaniyê bûn.
‘Em di têkoşîna xwe de mafdar in’
Parlementer Gulderen Varli di daxuyaniyê de axivî û diyar kir ku emniyet û walîtiyê di 25ê Mijdarê Roja Têkoşîna Li Dijî Tundiya Li Ser Jinan de helwesteke ku mirov dikare weke îşkenceyê pênase bike, nîşan da. Gulderen Varliyê da zanîn ku ew vê yekê qebûl nakin û got: “Emniyeta ku dosyeya Rojîn Kabaîşê ronî nake, diçe wêneyên jinên ku ji bo jiyaneke birûmet têkoşiyane kom dike. Çima emniyet û walîtî cinayetên jinan ronî nakin? Em di têkoşîna xwe de mafdar in. Em ji bo jiyanê li vir in û em ji bo vê yekê jî bi israr in. Em vê pêkanîna dewlet û mêran qebûl nakin.”
Daxuyanî bi dirûşmeyên “jin jiyan azad”, “Nagîhan Akarsel rûmeta me ye” bi dawî bû.
