Platforma Saziyên Demokratîk ên Amedê bi minasebeta 1ê Mijdarê Roja Kobanê ya Cîhanê daxuyanî da çapemeniyê û wiha got: “Ev berxwedana ku bi pêşengiya jinan hate kirin, derîyek din ji bo avakirina jiyaneke demokratîk, ekolojîk û azadîxwaz a jinan bi felsefeya Jin Jiyan Azadî vekir.”
Platforma Saziyên Demokratîk ên Amedê bi minasebeta 1ê Mijdarê Roja Kobanê ya Cîhanê devera Dortyolê ya li navçeya Rezana Amedê daxuyanî da çapemeniyê. Di daxuyaniyê de pankarta “1ê Mijdarê Roja Cîhanê ya Kobanê Pîroz be” hat vekirin. Endamên Platforma Saziyên Demokratîk û nûnerên saziyan beşdarê daxuyaniyê bûn. Di daxuyaniyê de bi dirûşmeyên “Bijî Berxwedana Kobanê”, “Bijî berxwedana zindanan”, “Bijî Serok Apo” û “Jin Jiyan Azadî” hatin berzkirin. Kurdiya daxuyaniyê Hevseroka Partiya Heremên Demokratîk (DBP) a Amedê Rûçem Vefa Elyakut, Tirkiya daxuyaniyê jî Hevserokê Partiya Wekhevî û Demokrasiyê ya Gelan(DEM Partî) a Amedê Abbas Şahîn xwend.
‘Berxwedan Kobanê ya destanî 134 rojan hate nîşandan’
Hevseroka DBPê Rûçem Vefa Elyakut 1ê Mijdarê Roja Cîhanî ya Piştgiriya Kobanê pîroz kir û dîyar kir ku berxwedana Kobanê bû ye wek mîrateya têkoşîna hevpar a hemû cîhanê ye û rûpelên dîrokê de cîh girtiye û got: “Ji ber tam 11 sal berê, li hember êrîşên DAIŞ’ê yên li ser Kobanê, berxwedaneke destanî ya 134 rojan hate nîşandan, bi piştgiriya enternasyonal a şoreşgerên ji çar aliyên cîhanê hatin, berxwedana Kobanê bi ser ket û wek diyarî ji hemû gelên cîhanê re hate pêşkêşkirin. Ev berxwedana ku bi pêşengiya jinan hate kirin, derîyek din ji bo avakirina jiyaneke demokratîk, ekolojîk û azadîxwaz a jinan bi felsefeya Jin Jiyan Azadî vekir. Tam jî ji ber vê yekê, gelên cîhanê bi bangewaziya xwediyên Xelata Nobelê ya Aştiyê, akademîsyen, ronakbîr, nivîskar û rêxistinên girseyî yên demokratîk, 1ê Mijdarê 2014 Roja Cîhanî ya Piştgiriya Kobanê îlan kirin. Bi vî awayî, berxwedana Kobanê wek mîrateya têkoşîna hevpar a hemû cîhanê, di rûpelên herî ronak ên dîrokê de cihê xwe girt.”
‘Pêşengên siyaseta demokratîk dîlgirtî ne’
Rûçem Vefa Elyakutê wiha dirêjî da axaftina xwe: “Aqilê tarî yê DAIŞê, dijminatiya li hember jinan, îradeya jiyana hevpar a gelan, baweriyên cuda, îro jî li Rojhilata Navîn bi navên din û bi destên din hewl dide hebûna xwe bidomîne. Li Sûriyê êrîşên li hember bawerî û nasnameyan ên li ser Kurd, Elewî û Dûrziyan têne kirin, nîşana vê ye. Ev êrîşên bi piştgiriya hêzên kapîtalîst têne kirin, dixwazin gelên Rojhilata Navîn li hember hev derxin, baweriyan li hember hev bidin rûniştandin û xewnên xwe yên emperyal bi cih bînin. Berxwedana Kobanê ya ku haveynê Şoreşa Rojava ava dike, îro jî li hember van êrîşan, bûye hêviya hemû gel û jinan ên ku têkoşîna azadî û wekheviyê didin.Dema ku hemû gelên cîhanê li hember êrîşên çeteyên DAIŞê yên li ser Kobanê dengê xwe bilind kirin, îro li erdnîgariya ku em tê de dijîn, îradeyên pêşeng ên siyaseta demokratîk ên ku berxwe dan, hîn jî di girtîgehan de wek rehîn têne girtin. Parastina Kobanê, li hember sûcên li hember mirovahiyê rawestin e. Parastina Kobanê, li hember siyaseta yekperest, zayendperest, mezhebperest û mîlîtarîst, parastina jiyana cuda cuda ye.Tam jî ji ber vê yekê, ji ber ku berxwedana Kobanê diparêzin, îro Fîgen Yuksekdag û Selahattîn Demîrtaş ên ku di pêş de ne, hemû girtiyên Kobanê divê bên berdan û rê li pêş siyaseta demokratîk were vekirin.”
‘Dewlet divê guhertinên hiqûqî û yasayî yên li ser milê xwe pêk bîne’
Rûçem Vefa Elyakut bal kişand li ser pêvajoya Aştî û Civaka Demokratîk û diyar kir ku azadiya Rêberê Gelê Kurd Abdullah Ocalan û Mafê Hêviyê divê bê pêkanîn û wiha got: “Bi rastî jî, bi bangewaziya Birêz Ocalan a 27ê Sibatê dest pê kir û bi biryara vekişîna hêzên Tevgera Azadiya Kurd ji axa Tirkiyê ya di 26ê Cotmeha 2025an de berdewam e, rihê Pêvajoya Aştî û Civaka Demokratîk ev yek pêwîst dike. Ji bo pêvajo zûtir bi rê ve biçe, rê li pêşiya siyaseta demokratîk û avakirina aştiya civakî were vekirin, ev biryara vekişînê ya xwedî girîngiya dîrokî û jiyanî, careke din dilsozî, baweriya bi aştî û çareseriya demokratîk derxist holê. Her çiqas gavên girîng ji bo bingeha sazî û hiqûqî ya pêvajoyê hatibin avêtin; di Meclîsê de bi beşdariya hemû partiyan Komîsyona Hevgirtina Neteweyî, Xwişk û Biratî û Demokrasiyê hate avakirin, îradeyeke ku bingeha siyasî ya aştiya civakî xurt dike hate nîşandan, lêbelê ku komîsyon heta niha bi muzakerekarê sereke yê pêvajoyê Birêz Ocalan re hevdîtin nekiriye, ji aliyê gelê Kurd û gelên din ve nayê qebûlkirin. Li ser vê bingehê; Birêz Abdullah Ocalan divê bi hemû beşên civakê re nîqaşên pêvajoyê bimeşîne, bi guhertinên hiqûqî yên ku azadiya wî ya fizîkî pêk bîne, bigihîje. Dewlet divê guhertinên hiqûqî û yasayî yên li ser milê xwe pêk bîne. Di vê wateyê de, serkeftina Pêvajoya Aştî û Civaka Demokratîk ne tenê ya gelê Kurd e; ya hemû bawerî û nasnameyan, bi kurtî ya hemû gelên herêmê ye.Îro di pêvajoya aştî û civaka demokratîk de, bawerî û hêviya gelên me ya bi aştî, têkoşîna ku em bi dehsalan dimeşînin, ji serketina Kobanê hêzê digirin. Berxwedana Kobanê perdeya tarî ya ku hêzên yekperest, mezhebperest û mîlîtarîst dixwazin biafirînin, diqetîne û riya gelan ronî dike. Ev berxwedan di heman demê de ji hemû gelên cîhanê re bû rêya piştgiriya enternasyonalîst, têkoşîna yekbûyî ya jinan û ji hemû civakê re bû hêvî.”
