Li Amedê Foruma Avê ya Mezopotamyayê ya 2yemîn dest pê kir û dê sê rojan bidome. Di axaftinên destpêkê yên forumê de hate destnîşankirin ku axa Mezopotamyayê çavkaniya avê ye û divê her kes xwedî li av û axa xwe derkeve.
Foruma Avê ya Mezopotamyayê ya 2yemîn bi hevkariya Şaredariya Bajarê Mezin a Amedê, Foruma Avê ya Mezopotamyayê û Tevgera Ekolojiyê ya Mezopotamyayê ji bo 3 rojan li avahiya ÇandAmedê tê lidarxistin. Roja yekemîn a forumê dest pê kir. Gelek nûner û rêveberên sazî û dezgehên ekolojiyê yên li Kurdistanê tev li forumê bûn.
Li ser navê Komîteya Amadekar a Forumê axaftina destpêkê Fatîh Şahîn kir. Fatîh Şahîn di axaftina xwe de bal kişand ser îsrafkirina avê û talankirina xwezaya Kurdistanê.
Di forumê de Hevseroka Giştî ya Partiya Herêmên Demokratîk (DBP)ê Çîgdem Kiliçgun Uçar, Hevşaredarê Amedê Dogan Hatun, Serokê TMMOBê Emîn Koramaz, li ser navê Kampanya Dîcleyê Zîndî Bigire Îsmaeel Dawood û li ser Tevgera Ekolojiyê jî Derya Akyol axivîn û polîtîkayên avê nirxandin.
‘Mezopotamya cih û warê avê ye’
Hevşaredarê Bajarê Mezin ê Amedê Dogan Hatun jî axivî û wiha got: “ Qonaxa destpêka mirovahiyê Mezopotamya ye. Mezopotamya keleha kedê ye û îro jî av li Mezopotamyayê çavkaniya herî sereke ye. Mezopotamya bi av û xweza tê nasîn.”
‘En dawî li krîza avê bînin’
Hevseroka DBPê Çîgdem Kiliçgun Uçar jî axivî û wiha got: “Di pergala kapîtalîst de pirsgirêka avê her roj zêde dibe. Peywîra me ya yekemîn xwedîderketina li avê ye. Em bang li hemû kesî dikin ku rê li ber îsrafkirina avê bigirin û em bi hev re dawî li krîza avê bînin.”
Bername dê heta roja yekşemê bi rûniştin û nirxandinên cuda yên li ser avê berdewam bike.
