Komîteyek leşkerî û ewlehiyê ji Bakur û Rojhilatê Sûriyeyê li paytexta Sûriyeyê Şamê ye. Komîte dê mijarên ewlehî û leşkerî bi rayedarên hikûmeta demkî re gotûbêj bike.
Li gorî nûçeya ANHAyê; komîte duh êvarê gihîşt paytexta Sûriyeyê Şamê. Komîte ji endamên Fermandariya Giştî ya Hêzên Sûriya Demokratîk (HSD) Sozdar Hacî û Sîpan Hemo, Berdevkê HSDê Ebcer Dawud û ji fermandarên HSDê Şakir Ereb, ji fermandarên Hêzên Ewlekariya Hundirîn Dilêr Hisên Temo, Elî Xidir El Hesen, Mistefa Mehmûd Delî, Aho Êlyo Lehdo, cîgira hevserokên Desteya Hundirîn a Bakur û Rojhilatê Sûriyeyê Arîn Mistefa pêk tê.
Endamên komîteyê dê bi rayedarên leşkerî û ewlehiyê yên wezaretên parastin û karên hundirîn ên hikûmeta demkî re mijarên ewlehî û leşkerî gotûbêj bikin.
Fermandarê Giştî yê Hêzên Sûriyeya Demokratîk (HSD) Mezlûm Ebdî 11ê Cotmehê di hevpeyvînekê li gel Ronahî TV de ragihandibû ku komîteyeke leşkerî û ewlehiyê dê di demek nêzîk de biçe Şamê.
