Amed – Hevserokê MEBYA-DERa Amedê Razaman Dengîz têkildarî civîna wan a li komîsyonê diyar kir ku wan ji komîsyonê re daxwazên xwe û malbatên ku zarokên wan jiyana xwe dest dane anîne ziman û wan ji komîsyonê xwestiye ku komîsyon biçe Îmraliyê û ji bo gorên bênav komîsyonek were avakirin.
Hevserokê Komeleya Piştgirî û Yekitiyê ya ji bo Kesên Xizm û Nasên xwe li Dergûşa Şaristaniyê Windakirinê re (MEBYA-DER) a Amedê Ramazan Dengîz jî tev li rûniştina 2yemîn a civîna 14emîn a Komîsyona Demokrasî, Xwişk-Biratî û Hevgirtina Mîllî bûbû û axaftinek kiribû. Ramazan Dengîz têkildarî civîna li komîsyonê ji Ajansa Welat (AW) re axivî.
‘Yek aliyê pêvajoyê jî em in’
Ramazan Dengîz diyar kir ku ji bo tev li komîsyonê bibin wan serlêdan kiribû û ev serlêdana wan hate pejirandin û got: “Yek ji aliyê pêvajoyê em in. Pêvajoya şer gelek bandor li ser me kir. Me li wir gelek tişt anîn ziman. Li wir di serî de me sedema avakirina MEBYA-DERê eşkere kir. Me got saziya me ji aliyê kesên zarokên wan di şer de jiyana xwe ji dest dane hatiye avakirin. Êşên malbatên me kişandiye me eşkere kir. Hevseroka MEBYA-DERa Êlihê Nezahat Toprak jî li wir bû û wê jî êşên ku malbatan kişandine anîn ziman.”
‘Me pêşniyara avakirina bankaya DNAyê kir’
Ramazan Dengîz bal kişand ser daxwazên ku kirine û ev yek anîn ziman: ““Me hin xalan anîn ziman. Divê di serî de dewlet êşên ku malbatan kişandine bibîne û hîs bike. Li Amedê 337 cenaze bi komî hatine veşartin. Nayê zanîn ku cenaze aîdî kê ne û malbatên wan nayên zanîn. Me pêşniyara avakirina bankaya DNAyê kir. Piştî vê divê gor bên vekirin û testên DNAyê bên kirin. Bi vî awayî nasnameya hevalên şehîd dê derkevin holê.”
‘Divê komîsyonek bê avakirin û wan gorên bênav tespît bike’
Ramazan Dengîz destnîşan kir ku piştî kesên di şer û pevçûnan de jiyana xwe ji dest didin dewlet dozan li malbatên wan vedike û got: “Dewlet hem dozn li malbatan vedike hem jî hêcz ji malbatan re dişîne. Me anî ziman ku ev pirsgirêkekî mezin e. Divê ev jî holê bên rakirin. Yêk jî daxwaza me li ser gorên bênav bû. Li gelek bajarên bakurê Kurdistanê gorên bênav hene. Divê komîsyonekî bê alî were avakirin û van goran tespît bike. Ev gorên bê kes bi temamî werin eşkerekirin.”
‘Me pêşniyara hevdîtinê li komîsyonê kir’
Ramazan Dengîz bi lêv kir ku divê komîsyon bi Rêberê Gelê Kurd Abdullah Ocalan re hevdîtinê bike û wiha got: “Me pêşniyarî li komîsyonê kir ku bi birêz Abdullah Ocalan re hevdîtinê bike. Ji aliyê gel û saziyan ve hatiye diyarkirin ku birêz Abdullah Ocalan sermuzakerevan e. Komîsyon hevdîtinê neke ev nakokî ye. Divê komîsyon biçe Îmraliyê.”
‘Divê zimanê desthilatê û çapemeniyê bê guhertin’
Ramazan Dengîz diyar kir ku wan zimanê desthilatê û zimanê medyayê têkildarî pêvajoyê anîne ziman û wiha got: “Hê jî çapamenî û desthilat zimanê dijminatî bikar tîne û bi zimanê dijminatî nêzî pêvajoyê dibe. Ev ziman û şêwaza desthilatê û çapameniyê divê bê guherandin. Me gelek êş kişandiye lê malbatê me bi dilekî baş nêzî pêvajoyê dibin. Û me jî piştgiriya xwe li vir anî ziman. Piştî civîn li komîsyon bi dawî bû serokê komîsyonê Numan Kurtulmuş hat cem hevala Nezahat Toprak û jê re got, ‘gotina we li ser min gelek bandor kiriye’. Nêzikbûna komîsyonê gelek baş bû. Me dosyekî berfireh teslimî komîsyonê kir û daxwazê xwe anîn ziman.”
